मुंबई : अमेरिकेचे राष्ट्राध्यक्ष डोनाल्ड ट्रम्प यांनी पुढील महिन्यापासून औषधांवर १०० टक्के कर लादण्याच्या केलेल्या घोषणेचा भांडवल बाजाराला मोठा धक्का बसला. घोषणा होताच औषध आणि आयटी समभागांची जोरदार विक्री झाल्याने सेन्सेक्स ७३३.२२ अंकांनी घसरून ८०,४२६. ४६ या तीन आठवड्यांच्या नीचांकी पातळीवर बंद झाला. दिवसभरात सेन्सेक्सने ८२७. २७ अंकांची गटांगळी खाल्ली होती. निफ्टी देखील २३६.१५ अंकांनी घसरून २४,६५४.७० या तीन आठवड्यांच्या नीचांकी पातळीवर बंद झाला. सलग सहाव्या सत्रात घसरणीची नोंद झाली. या सप्ताहात सेन्सेक्स २,५८७.५० अंकांनी आणि निफ्टी ७६८.९ अंकांनी घसरला.
बीएसई स्मॉलकॅप निर्देशांकात २.०५ टक्क्यांची मोठी घसरण झाली, तर मिडकॅप निर्देशांकात १.९६ टक्क्यांची घसरण झाली. सर्व क्षेत्रीय निर्देशांक मोठ्या प्रमाणात विक्रीच्या दबावामुळे घसरणीसह बंद झाले. दूरसंचार क्षेत्रातील निर्देशांक सर्वात जास्त घसरला. त्यापाठोपाठ आयटी, ग्राहकोपयोगी वस्तू निर्देशांकात न . न –
घसरण झाली. महिंद्रा अँड महिंद्रा, इटरनल, टाटा स्टील, बजाज फायनान्स, एशियन पेंट्स, सन फार्मा, टेक महिंद्रा, इन्फोसिस, टाटा कन्सल्टन्सी सर्व्हिसेस आणि एचसीएल टेक यांचे शेअर्स सर्वात जास्त घसरले; पण लार्सन अँड टुब्रो, टाटा मोटर्स, आयटीसी आणि रिलायन्स इंडस्ट्रीजच्या शेअर्समध्ये तेजी दिसून आली.
अमेरिकेने ब्रँडेड आणि पेटंट केलेल्या औषधांच्या आयातीवर १०० टक्के शुल्क लादण्याच्या घोषणेनंतर मोठ्या प्रमाणात विक्री झाल्यामुळे शेअर बाजारांमध्ये मोठी घसरण झाली. या अनपेक्षित निर्णयामुळे आधीच चिंताग्रस्त असलेले गुंतवणूकदार आणखी चिंताग्रस्त झाले. एच-१वी व्हिसा शुल्कात वाढ करण्याच्या अलीकडच्या निर्णयानंतर आयटी शेअर्समध्येही मोठी विक्री होत आहे असे, ऑनलाइन ट्रेडिंग आणि वेल्थ टेक्नॉलॉजी फर्म एनरिच मनीचे मुख्य कार्यकारी अधिकारी पोनमुडी आर. यांनी सांगितले. आशियाई बाजारपेठांप्रमाणे, भारतीय शेअर बाजारातही मोठी घसरण दिसून आली. अमेरिकेने औषध आयातीवर नवीन शुल्क जाहीर केल्यानंतर फार्मा समभाग घसरणीसह बंद झाले असे जिओजित इन्व्हेस्टमेंट्स लिमिटेडचे संशोधन प्रमुख विनोद नायर म्हणाले.
फार्मा समभाग झाले कडू
औषधांवरील करामुळे फार्म क्षेत्र हादरले. कहार्ट लिमिटेड, इंडोको रेमेडीज, झायडस लाइफसायन्सेस, ग्लेनमार्क फार्मा, नॅटको फार्मा, सन फार्मा, ल्युपिन, डॉ. रेड्डीज, अरबिंदो फार्मा या बड्या कंपन्यांच्या समभागांमध्ये मोठी घसरण झाली. परिणामी, बीएसई हेल्थकेअर निर्देशांक २.१४ टक्क्यांनी घसरून ४३,०४६.६९ वर पोहोचला.
परिणाम फक्त पेटंट, बँडेड उत्पादनांवर
१ ऑक्टोबरपासून औषधांवर १०० टक्के आयात शुल्क लादण्याच्या अमेरिकेच्या निर्णयाचा परिणाम फक्त पेटंट आणि ब्रँडेड उत्पादनांवर होईल, जेनेरिक औषधांवर नाही. हे शुल्क जेनेरिक औषधांना लागू होणार नाही, असे देशातील आघाडीच्या २३ औषध कंपन्यांचे प्रतिनिधित्व करणाऱ्या फार्मास्युटिकल असोसिएशन (आयपीए) या संस्थेचे सरचिटणीस सुदर्शन जैन यांनी म्हटले आहे. अमेरिकेचे राष्ट्राध्यक्ष डोनाल्ड ट्रम्प यांचे विधान अमेरिकेला पुरवल्या जाणाऱ्या पेटंट आणि ब्रँडेड उत्पादनांबद्दल आहे.