आयटीआयमध्ये अतिरिक्त वेळेत अडीच हजार तुकड्या सुरू करणार, मंत्री लोढा यांची माहिती

मुंबई : राज्यातील औद्योगिक प्रशिक्षण संस्था व तांत्रिक विद्यालय केंद्रांमध्ये संस्थेच्या वेळेव्यतिरिक्त मुख्यमंत्री अल्पमुदतीचे रोजगारक्षम अभ्यासक्रम कार्यक्रम सुरू करण्याचा निर्णय शासनाने घेतलेला आहे. येत्या ९ ऑक्टोबर २०२५ पासून राज्यातील ४१९ शासकीय औद्योगिक प्रशिक्षण संस्था (आयटीआय) व १४१ शासकीय तांत्रिक विद्यालयामधून एकूण २ हजार ५०६ प्रशिक्षण तुकड्या सुरू होतील. पंतप्रधान नरेंद्र मोदी यांच्या हस्ते पहिल्या तुकडीचे ऑनलाइन उद्घाटन लवकरच करण्यात येणार आहे, अशी माहिती कौशल्य विकास मंत्री मंगलप्रभात लोढा यांनी दिली.

पंतप्रधान मोदी यांच्या अमृतमहोत्सवी वाढदिवसाचे औचित्य साधून प्रतिवर्षी ७५ हजार प्रशिक्षणार्थीना ‘मुख्यमंत्री अल्पमुदतीचे रोजगारक्षम अभ्यासक्रम’ कार्यक्रमातून प्रशिक्षित करण्याचे कौशल्य, रोजगार, उद्योजकता व नाविन्यता विभागाने निश्चित केले आहे. यासाठी प्रमाणित कार्यपद्धती व ऑनलाइन प्रवेश प्रणाली निश्चित करण्यात आली आहे. अल्पमुदत अभ्यासक्रमांसाठी २५ टक्के जागा संस्थेतील विद्यार्थ्यांसाठी राखीव आहेत. उर्वरित जागा बाह्य उमेदवारांना उपलब्ध असतील. प्रशिक्षण शुल्क १ ते ५ हजार रुपये प्रति महिना असेल. या कार्यक्रमांतर्गत विविध नवयुगीन व पारंपरिक रोजगाराभिमुख अभ्यासक्रम शिकवले जाणार आहेत.

यामध्ये अॅडि टि व्ह मॅन्युफॅक्चरिंग, एरोस्पेस स्ट्रक्चर फिटर, इंटरनेट ऑफ थिंग्ज, इलेक्ट्रिक व्हेईकल, सोलर एनर्जी, ड्रोन तंत्रज्ञान, सोशल मीडिया इन्फ्लुएन्सर, सायबर सुरक्षा, आर्टिफिशियल इंटेलिजन्स, ग्रीन हायड्रोजन, मोबाईल रिपेअर टेक्निशियन इत्यादी अभ्यासक्रमांचा समावेश आहे. अधिक माहिती व प्रवेश नोंदणीसाठी जवळच्या शासकीय औद्योगिक प्रशिक्षण संस्था किंवा शासकीय तांत्रिक विद्यालयाशी संपर्क साधावा, असे आवाहन मंत्री लोढा यांनी केले आहे.