वॉशिंग्टन : युद्धग्रस्त गाझापट्टीत गेल्या दोन वर्षांपासून सुरू असलेल्या युद्ध समाप्तीसाठी अमेरिकेचे राष्ट्राध्यक्ष डोनाल्ड ट्रम्प यांनी बाह्या सरसावल्या आहेत. गाझाचा एक नवा नकाशा बनवत त्यांनी गाझात चिरस्थायी शांतता प्रस्थापित करण्याच्या हेतूने २० कलमी कार्यक्रम जगापुढे मांडला आहे. यात इस्रायलपासून बफर झोन वेगळा करण्याचा समावेश आहे. भारत, चीन, युरोपियन संघ आणि जॉर्डन, कतार, संयुक्त अरब अमिरात (यूएई), इंडोनेशिया, पाकिस्तान, तुर्कीये, सौदी अरेबिया आणि इजिप्तसह जगातील इतर अनेक देशांनी ट्रम्प यांच्या प्रस्तावाला पाठिंबा दिला. मात्र, हमासने अद्यापही भूमिका स्पष्ट केलेली नाही.
इस्त्रायल व गाझा यांच्यातील संघर्ष थांबवण्याकरिता डोनाल्ड ट्रम्प यांनी सादर केलेल्या नकाशानुसार, यापुढे गाझा व इस्त्रायल यांच्यात एक बफर झोन असणार आहे. याचाच अर्थ बफर झोन क्षेत्र इस्रायल ओलांडू शकणार नाही तसेच पॅलेस्टीनचे नागरिकही इथे येऊ शकणार नाहीत. ट्रम्प यांच्या नकाशात निळ्या, पिवळ्या आणि लाल रंगाच्या तीन रेषा ओढलेल्या आहेत. त्यानंतर बफर झोन असणार आहे. निळी रेषा ही दक्षिण गाझा पट्टीतील शहर खान युनिसजवळ आहे. तिथपर्यंत इस्रायलच्या संरक्षण दलाचे (आयडीएफ) नियंत्रण आहे. त्यानंतर ट्रम्प यांच्या नकाशात पिवळी एक पहिली माघारी परतण्याची रेषा आहे. जी रेषा राफा शहरातून जाते. याचाच अर्थ बंधकांच्या सुटकेनंतर आयडीएफ पिवळ्या रेषेपर्यंत येणार आहेत. पुढे लाल रंगाची दुसरी लक्ष्मण रेषा आहे.
जिथपर्यंत इस्रायलचे सैन्य येऊन थांबेल. पुढे बफर झोन सुरू होईल, असे डोनाल्ड ट्रम्प यांनी नकाशात नमूद केले. इस्रायलचे पंतप्रधान बेंजामिन नेतन्याहू यांनी वॉशिंग्टन येथे ट्रम्प यांची भेट घेत गाझा शस्त्रसंधी योजनेवर सविस्तर चर्चा केली. त्यानंतर ट्रम्प यांनी शस्त्रसंधी योजना जगापुढे मांडली आहे. गाझाचे पुनरुत्थान, पॅलेस्टिनी नागरिकांचे विस्थापन रोखणे व व्यापक शांततेला प्रोत्साहन देण्याचा ट्रम्प यांचा प्रस्ताव स्वागतार्ह आहे. आम्ही अमेरिकेच्या व्यापक करारानसार
गाझातील युद्ध समाप्तीसाठी कटिबद्ध आहोत. या निर्णयामुळे गाझामध्ये पीडितांना मानवीय मदत पुरवठा सुरळित होईल, अशी आशा जॉर्डन, कतार, संयुक्त अरब अमिरात (यूएई), इंडोनेशिया आदी देशांनी व्यक्त केली.
हमासच्या प्रत्युत्तराची प्रतीक्षा
दरम्यान, डोनाल्ड ट्रम्प यांनी गाझा संघर्ष संपुष्टात आणण्यासाठी सादर केलेल्या २० सूत्री कार्यक्रमाचे अरब व मुस्लिम देशांसह भारताने स्वागत केले. भारताचे पंतप्रधान नरेंद्र मोदी यांनी गाझा पट्टीतील शस्त्रसंधीबाबतच्या ट्रम्प यांच्या योजनेचे स्वागत केले. ही योजना पॅलेस्टिनी आणि इस्रायली लोकांसाठी तसेच मोठ्या पश्चिम आशियाई प्रदेशासाठी दीर्घकालीन शांतता, सुरक्षा आणि विकासाचा एक व्यवहार्य मार्ग प्रदान करते, असे मोदींनी म्हटले आहे. दुसरीकडे. इस्रायलचे पंतप्रधान बेंजामिन नेतन्याहू यांनीसुद्धा ट्रम्प यांच्या योजनेवर आक्षेप नसल्याचे सांगितले. याचवेळी गाझा संघर्षावर चर्चा केल्यानंतर कतार व इजिप्तच्या मध्यस्थीने अमेरिकेचे राष्ट्राध्यक्ष डोनाल्ड ट्रम्प यांचा प्रस्ताव हमासला देण्यात आला आहे. मात्र, हमासच्या नेत्यांनी कोणतीही प्रतिक्रिया दिलेली नाही. ट्रम्प यांच्या प्रस्तावावर आम्ही सखोल विचार करणार आहोत. त्यानंतरच भूमिका स्पष्ट केली जाईल, असे हमासच्या सत्रांनी सांगितले आहे.