नवी दिल्ली : M3M हुरुन इंडिया रिच लिस्ट 2025 नुसार रिलायन्स इंडस्ट्रीजचे अध्यक्ष मुकेश अंबानी यांनी पुन्हा एकदा भारतातील सर्वात श्रीमंत व्यक्त मिळवला आहे. 68 वर्षीय अंबानी यांची संपत्ती 9.55 लाख कोटी रुपये (105 अब्ज डॉलर्स) इतकी आहे. तर 63 वर्षीय गौतम अदानी आणि त्यांचा कुटुंबाकडे 8.15 लाख कोटी रुपयांसह दुसऱ्या स्थानावर आहेत.
या यादीच्या प्रथमच एका महिलेनं पहिल्या तीनमध्ये स्थान मिळवलं आहे. रोशनी नदार मल्होत्रा (44) आणि त्यांच्या कुटुंबाने 2.84 लाख कोटींची संपत्ती आहे. त्या फक्त भारतातील सर्वात श्रीमंत महिला ठरल्या नाहीत तर टॉप-10 मधील सर्वांत तरुणही महिलाही ठरल्या आहेत.
2025 च्या या यादीत भारतातील अब्जाधीशांची संख्या आणखी वाढली आहे. देशात सध्या 350 हून अधिक अब्जाधीश असून गेल्या १३ वर्षात ही संख्या सहा पटीने वाढली आहे. एकूण 1,687 जणांची संपत्ती 1,000 कोटी रुपयांपेक्षा अधिक आहे. यावर्षी नव्याने 284 नावे या यादीत समाविष्ट झाली आहेत. मागील दोन वर्षांत दर आठवड्याला भारतात सरासरी एक नवीन अब्जाधीश तयार झाला आहे.
अहवालानुसार, भारतातील सर्वात श्रीमंत व्यक्तींच्या संपत्तीत दररोज सरासरी 1,991 कोटी रुपयांची भर पडली. बजाज कुटुंब निरज बजाज) यांच्या संपत्तीत सर्वाधिक वाढ नोंदवण्यात आली आहे. त्यांची संपत्ती 69,875 कोटी रुपयांनी वाढून 2.33 लाख कोटींवर गेली आणि ते सहाव्या स्थानावर पोहोचले.
सर्वात तरुण अब्जाधीशांच्या यादीत अरविंद श्रीनिवास (31), Perplexity चे संस्थापक, 21,190 कोटी रुपयांच्या संपत्तीसह पहिल्यांदा क्रमांकावर आहेत. तर झेप्टोचे सहसंस्थापक कैवल्य वोहरा (22) आणि आदित पलीचा (23) यांनी देखील या यादीत स्थान मिळवले आहे.
मनोरंजन क्षेत्रात मोठी झेप घेत शाहरुख खान यांनी पहिल्यांदाच अब्जाधीश क्लबमध्ये प्रवेश केला असून त्यांची संपत्ती 12,490 कोटी रुपये झाली आहे. तर पेटीएमचे संस्थापक विजय शेखर शर्मा यांनीही पुनरागमन केले. कंपनीच्या शेअर किमतीतील झपाट्याने वाढ झाल्यामुळे त्यांची संपत्ती 15,930 कोटी रुपयांवर पोहोचली.
मुंबई अजूनही सर्वात जास्त श्रीमंत व्यक्तींचं शहर ठरलं आहे. यादीत मुंबईतून 451, नवी दिल्लीतून 223 आणि बेंगळुरूमधून 116 नावे समाविष्ट झाली आहेत. यावर्षी एकूण 101 महिलांचा या यादीत समावेश आहे.
टॉप-10 श्रीमंत भारतीयांची संपत्ती एकूण यादीतील 28 टक्के इतकी आहे, तर अंबानी आणि अदानी यांच्या संपत्तीचा हिस्सा एकूण संपत्तीपैकी 12 टक्के आहे. 2025 च्या यादीतील एकत्रित संपत्ती 167 लाख कोटी रुपये झाली असून ती स्पेनच्या GDP पेक्षाही जास्त आहे आणि भारताच्या GDP च्या जवळपास निम्मी आहे.