टोकियो : जपानच्या संसदेने मंगळवारी पुराणमतवादी विचारांच्या साने ताकाइची यांची देशाच्या पहिल्या महिला पंतप्रधान म्हणून निवड केली. चीनविरोधात ठोस भूमिका घेणाऱ्या ताकाइची यांच्यासमोर पंतप्रधान झाल्यानंतर आता महागाई कमी करण्याचे आणि अर्थव्यवस्था सांभाळण्याचे मोठे आव्हान आहे. दरम्यान, पंतप्रधान नरेंद्र मोदी यांच्यासह विविध जागतिक नेत्यांनी ताकाइची यांना शुभेच्छा दिल्या.
चालू महिन्याच्या सुरुवातीला माजी आर्थिक सुरक्षामंत्री साने ताकाइची यांची सत्ताधारी लिबरल डेमोक्रॅटिक पक्षाच्या अध्यक्षपदी निवड झाली होती. जपानमधील बहुमत असणाऱ्या पक्षाच्या अध्यक्षालाच पंतप्रधान बनवले जाते. त्यानुसार संसदेच्या कनिष्ठ सभागृहात पंतप्रधानपदासाठी झालेल्या निवडणुकीत साने ताकाइची यांनी १४९ विरुद्ध २३७ मतांनी विजय मिळवला. ताकाइची यांनी ‘कॉन्स्टिट्युशनल डेमोक्रॅटिक पार्टी ऑफ जपान’चे प्रमुख योशिको नोडा यांचा पराभव केला. ताकाइची यांनी शिगेरु इशिबा यांची जागा घेतली आहे. पंतप्रधान म्हणून फक्त वर्षभर जपानची धूरा सांभाळणाऱ्या इशिबा यांनी मंगळवारी सकाळी मंत्रिमंडळासह आपल्या पदाचा राजीनामा दिला. त्यामुळे ताकाइची यांचा सत्तेत येण्याचा मार्ग मोकळा झाला. सभागृहातील विजयानंतर ताकाइची यांनी सर्वांचे आभार मानले. ताकाइची या पंतप्रधान झाल्या असल्या तरी संसदेच्या दोन्ही सभागृहात त्यांच्या आघाडीकडे काठावरचे बहुमत आहे. त्यामुळे कोणतेही विधेयक मंजूर करून घेण्यासाठी त्यांना विरोधी पक्षाचे समर्थन घ्यावे लागणार आहे. ताकाइची यांचे सरकार अस्थिरतेच्या गर्तेत सापडण्याची शक्यता व्यक्त केली जात आहे.
ताकाइची या माजी पंतप्रधान शिंजो आबे यांच्या निकटवर्ती मानल्या जातात. शिंजो यांनी प्रदीर्घ काळ जपानची सत्ता सांभाळली आहे. मात्र, जपानमध्ये गत ५ वर्षात चार पंतप्रधान बदलण्यात आले आहेत. आता ताकाइची या जपानच्या ५ व्या पंतप्रधान आहेत. ब्रिटनच्या माजी पंतप्रधान मार्गारेट थेंचर यांच्यापासून प्रेरित असलेल्या ताकाइची या १९९३ साली प्रथम संसदेत निवडून गेल्या होत्या. आतापर्यंत त्यांनी आर्थिक सुरक्षा, अंतर्गत व्यवहारमंत्री पदासह विविध प्रमुख पदांवर काम केले आहे. पंतप्रधान नरेंद्र मोदी यांनी पंतप्रधानपदी निवड झाल्याबद्दल ताकाइची यांचे अभिनंदन करत उभय देशातील संबंध मजबूत करण्यासाठी सोबत मिळून काम करण्याची इच्छा व्यक्त केली.