अखिल भारतीय महानुभाव परिषदेच्या ३८व्या अधिवेशनाचे उद्घाटन
नाशिक: मराठी भाषेचे विद्यापीठ तीर्थक्षेत्र रिद्धपूर येथे व्हावे, म्हणून सरकारने सातत्याने प्रयत्न केले. त्यास काही लोकांनी विरोध केला; परंतु मराठी भाषेचे विद्यापीठ रिद्धपूरलाच झाले असून, त्याचे कार्यदेखील आता सुरू झाले आहे. या ठिकाणी ५१ एकर जागेमध्ये विद्यापीठाची भव्य इमारत, तसेच अन्य सोयीसुविधा साकारण्यात येत असून, या विद्यापीठाला कीर्ती व दर्जा मिळवून देण्यासाठी आम्ही प्रयत्नशील आहोत, अशी ग्वाही मुख्यमंत्री देवेंद्र फडणवीस यांनी दिली. नाशिक येथे आयोजित अखिल भारतीय महानुभाव परिषदेच्या ३८व्या अधिवेशनाच्या उद्घाटनप्रसंगी मुख्यमंत्री बोलत होते.
मुख्यमंत्री फडणवीस म्हणाले, जगातील प्रमुख भाषांपैकी मराठी एक अत्यंत महत्त्वाची भाषा असून, १४ कोटींपेक्षा जास्त लोक ही भाषा बोलतात. मराठी भाषेला अभिजात दर्जा मिळून देण्यासाठी पुरावा आणि प्रमाण म्हणून ज्ञानेश्वरी ग्रंथाप्रमाणेच ‘लीळाचरित्र’ या महानुभाव पंथाच्या ग्रंथाचेही अत्यंत मोलाचे योगदान आहे. किंबहुना मराठी भाषा टिकवण्यासाठी सुमारे ८०० वर्षांपासून आजतागायत महानुभाव पंथातील आचार्य, संत, महंत यांच्यासह सर्वांनीच महत्त्वपूर्ण कार्य केले आहे. या पंथात पूर्वी हजारो ग्रंथ तयार झाले असून, सध्याच्या काळातही अनेक ग्रंथांचे प्रकाशन होत असते.
मराठी भाषा आपल्या देशात रुजवण्याचे काम खऱ्या अर्थाने महानुभाव पंथाने केले असून, गोविंद प्रभू, भटोबास, भाईदेव बास, केशोबास यांच्यापासून अनेक आचार्य संत-महंतांनी सातीग्रंथासह अनेक स्थान पोथ्यांमधून केवळ मराठी भाषेत जिवंत ठेवली नाही, तर तत्कालीन इतिहास, भूगोल, खाद्य संस्कृती, व्यापार-व्यवसाय याबाबतची माहिती जतन करीत संस्कृतीचा हा अमूल्य ठेवा आणि परंपरा पुढे नेली आहे. अनेक अडचणी व आक्रमणांमध्ये देखील या पंथातील सर्वांनीच आपला मार्ग सोडला नाही. आचार-विचार ढळू दिला नाही. त्यामुळेच या पंथाची तीर्थस्थाने संकटातून वाचली; परंतु त्यांना अनेक अडचणीदेखील निर्माण झाल्या. या अडचणी दूर करण्यासाठी आमचे सरकार गेल्या दहा वर्षांपासून सहकार्य करीत आहे. महानुभाव पंथाच्या तत्त्वज्ञानाने व परंपरेने समतेचा विचार दिला. भगवान श्री चक्रधर स्वामींचे विचार आजही अत्यंत मोलाचे आहेत. आजच्या काळात महंत कारंजेकर बाबा हे पंथाचे दूत म्हणून प्रत्येक कार्यात हजर असतात. आम्ही महानुभव पंथाच्या नेहमीच पाठीशी उभे आहोत, सर्व विकासकामे पूर्ण होतील, असे आश्वासन मुख्यमंत्र्यांनी यावेळी दिले.
व्यासपीठावर अ. भा. महानुभाव परिषदेचे मावळते अध्यक्ष कविश्वर कुलाचार्य विद्वांसबाबा शास्त्री, नवनिर्वाचित अध्यक्ष महंत कारंजेकर बाबा, जलसंपदामंत्री गिरीश महाजन, शिक्षणमंत्री दादा भुसे, आ. देवयानी फरांदे, आ. सीमा हिरे, आ. दिलीप बनकर, आ. प्रवीण तावडे, आ. अमोल जावळे, आ. श्वेता महाले, माजी आ. अविनाश ठाकरे, माजी आमदार बाळासाहेब सानप, परिषदेचे राज्याध्यक्ष प्रकाश ननावरे, दत्ता गायकवाड, सुभाष पावडे, प्रभाकर भोजने उपस्थित होते.