भारताच्या इलेक्ट्रिक वाहन क्षेत्रात आता स्मार्टफोन-आधारित तंत्रज्ञानाची नवी क्रांती घडणार आहे. सॅमसंगने आपल्या गॅलेक्‍सी वापरकर्त्यांसाठी एक अत्याधुनिक सुविधा जाहीर केली आहे. त्यामुळे महिंद्रा इलेक्ट्रिक ओरिजिन एसयूव्ही मालक आता प्रत्यक्ष चावीशिवाय आपले वाहन लॉक, अनलॉक आणि सुरू करू शकतील. सॅमसंग वॉलेटद्वारे ‘डिजिटल कार की’ सुविधा सादर करून सॅमसंगने भारतीय वाहन क्षेत्रात तंत्रज्ञानाचा एक महत्त्वाचा अध्याय सुरू केला आहे. दरम्यान महिंद्रा ग्रुप ही सॅमसंग वॉलेटसह हे ‘डिजिटल कार की’ वैशिष्ट्य एकीकृत करणारी पहिली भारतीय ओरिजिनल इक्विपमेंट मॅन्युफॅक्चरर (OEM) ठरली आहे.
गॅलेक्‍सी वापरकर्त्यांसाठी सुलभ ड्रायव्हिंग अनुभव
गुरुग्राम येथे २९ ऑक्टोबर २०२५ रोजी सॅमसंगने ही घोषणा करताना सांगितले की, सॅमसंग वॉलेटच्या माध्यमातून महिंद्रा इलेक्ट्रिक ओरिजिन एसयूव्हींमध्ये ‘डिजिटल कार की’ सुसंगतता आता उपलब्ध होईल. या सुविधेमुळे गॅलेक्‍सी डिव्हाइस वापरकर्ते चावीशिवाय आपल्या कारचे दरवाजे उघडू आणि बंद करू शकणार आहे. शिवाय इंजिनही सुरू करता येणार आहे.
याशिवाय, वापरकर्ते मर्यादित कालावधीसाठी आपल्या मित्र-परिवारासोबत ही डिजिटल की शेअरही करू शकतात, ज्यामुळे गरजेनुसार कारचे व्यवस्थापन अधिक सोयीस्कर बनते.
सॅमसंगकडून सुरक्षिततेला सर्वोच्च प्राधान्य
सॅमसंग इंडियाचे सर्व्हिसेस अँड अॅप्स बिझनेसचे वरिष्ठ संचालक मधुर चतुर्वेदी म्हणाले,“महिंद्रा ईएसयूव्ही मालकांना सॅमसंग वॉलेटच्या माध्यमातून ‘डिजिटल कार की’ची अविश्वसनीय सोय देताना आम्हाला आनंद होत आहे. गॅलेक्‍सी परिसंस्थेमध्ये अधिक कनेक्टेड आणि सुरक्षित अनुभव देणे ही आमची कटिबद्धता आणि महिंद्रासोबतचा हा सहयोग त्या दिशेने महत्त्वाचे पाऊल असल्याचं ते म्हणाले.
महिंद्राकडून भविष्यवादी नाविन्याचा टप्पा
महिंद्रा अँड महिंद्रा लि.च्या ऑटोमोटिव्ह विभागाचे मुख्य कार्यकारी अधिकारी आणि महिंद्रा इलेक्ट्रिक ऑटोमोबाइल लि.चे कार्यकारी संचालक नलिनीकांत गोलागुंता म्हणाले की, आमच्या इलेक्ट्रिक ओरिजिन एसयूव्ही XUV 9e आणि BE 6 ने ग्राहकांचे लक्ष प्रगत तंत्रज्ञान आणि भविष्यवादी डिझाइन्समुळे आधीच वेधले आहे. सॅमसंगसोबतच्या सहकार्यामुळे आम्ही आमच्या ग्राहकांना ‘डिजिटल कार की’ सारखे अत्याधुनिक तंत्रज्ञान देत आहोत. त्यामुले प्रवास अधिक सोपा आणि आनंददायक होईल.”
चोरी वा हरवलेल्या डिव्हाइससाठी पूर्ण संरक्षण
जर एखाद्या वापरकर्त्याचे डिव्हाइस हरवले किंवा चोरीला गेले, तर Samsung Find सेवेच्या मदतीने तो आपले डिव्हाइस दूरून लॉक करू शकतो किंवा त्यामधील डिजिटल कार की आणि इतर डेटा डिलीट करू शकतो.
सॅमसंग वॉलेटमध्ये बायोमेट्रिक अथवा पिन-आधारित प्रमाणीकरण आवश्यक असल्याने प्रत्येक संवादात सुरक्षा आणि गोपनीयतेची खात्री मिळते.
सॅमसंग वॉलेटचे सर्वसमावेशक तंत्रज्ञान
सॅमसंग वॉलेट हे बहुउद्देशीय प्लॅटफॉर्म आहे, ज्यामध्ये गॅलेक्‍सी वापरकर्ते डिजिटल कीज, पेमेंट पद्धती, आयडेंटिटी कार्ड्स आणि इतर आवश्यक माहिती एका सुरक्षित अॅप्लिकेशनमध्ये ठेवू शकतात. हे अॅप Samsung Knox या डिफेन्स-ग्रेड सिक्युरिटी तंत्रज्ञानाने संरक्षित आहे आणि गॅलेक्‍सी परिसंस्थेशी एकत्रित जोडलेले आहे. निवडक महिंद्रा ईएसयूव्हींसाठी ही ‘डिजिटल कार की, कार्यक्षमता भारतात लवकरच उपलब्ध होणार आहे.
ही भागीदारी भारतीय वाहन उद्योगासाठी एक महत्त्वपूर्ण डिजिटल पाऊल ठरत असून, स्मार्टफोन आणि वाहन यांच्यातील तंत्रज्ञानात्मक एकत्रीकरणाचा नवा मानदंड प्रस्थापित करणार आहे.