ICC Women Cricket World Cup 2025 : ऑस्ट्रेलियन गोलंदाज या लढतीत दडपणाखाली आले आणि त्यांनी तब्बल २६ अवांतर धावा दिल्या. यामध्ये सर्वाधिक १५ वाईडचा समावेश होता.
भारतीय संघाने तिसऱ्यांदा अंतिम फेरीत धडक मारली. मात्र २००५ आणि २०१७ मध्ये त्यांना अंतिम फेरीत उपविजेतेपदावर समाधान मानावे लागले होते.
नवी मुंबई : मुंबईकर जेमिमा रॉड्रिग्जची अविस्मरणीय शतकी (नाबाद १२७/१३४ चेंडू) खेळी आणि कर्णधार हरमनप्रीत कौरच्या (८९) संयमी अर्धशतकावर यजमान भारतीय संघाने आयसीसी एकदिवसीय विश्वचषकाच्या अंतिम फेरीत धडक मारली. तब्बल सात वेळच्या विजेता ऑस्ट्रेलियाचे उपांत्य फेरीतील ३३९ धावांचे आव्हान भारताने ५ गडी व ९ चेंडू राखून सर केले. कौर-रॉड्रिग्जने तिसऱ्या गड्यासाठी रचलेली दीड शतकी भागीदारी भारताच्या विजयाचे वैशिष्ट्य ठरले. विजेतेपदाची लढत भारत आणि द. आफ्रिका यांच्यात रविवारी डॉ. डी. वाय. पाटील स्टेडियममध्येच खेळवण्यात येईल. रॉड्रिग्जने आपल्या खेळीत १४ चौकार लगावले. भारतीय संघाने या विजयाच्या बळावर साखळीतील पराभवाची परतफेड केली.
विश्वचषकात प्रथमच खेळणारी शफाली वर्मा (१०) बाद होणारी पहिली फलंदाज ठरली. वेगवान गोलंदाज किम गर्थने सलामीवीर शफालीला पायचित पकडल्यानंतर भारताला आणखी एक झटका दिला. उपकर्णधार स्मृती मंधाना (२४ धावा, २ चौकार, १ षटकार) डाव्या बाजूचा चेंडू टोलावण्याच्या प्रयत्नात यष्टिरक्षक हिलीकडे झेल देत परतली. रॉड्रिग्ज आणि कौर यांनी त्यानंतर डावाची सूत्रे हाती घेतली. धावा काढण्याच्या स्पर्धेत रॉड्रिग्ज पुढे राहिली आणि ५७चेंडूंत तिने अर्धशतक झळकावले. एक बाजू लावून धरणाऱ्या कौरने अर्धशतकासाठी ६५ चेंडूंपर्यंत प्रतीक्षा केली. जलद गोलंदाज अॅनाबेल सुदरलँडने भारताला ३६ व्या षटकातील दुसऱ्या चेंडूवर जोरदार धक्का देत कौरला क्षेत्ररक्षक गार्डनरकरवी झेल बाद केले. कौरने ८८ चेंडूंत १० चौकार, २ षटकारांनी अर्धशतकी खेळी उभारली. तसेच रॉड्रिग्जसोबत तिसऱ्या गड्यासाठी १६७ धावांची भागीदारी रचली. चोरटी धाव घेण्याच्या प्रयत्नात दीप्ती शर्मा (२४ धावा, ३ चौकार) धावचित झाली. अर्धशतकानंतर
परिस्थितीनुसार रॉड्रिग्जने आपली खेळी पुन्हा एकदा उभारली. यामुळे विश्वचषकातील पहिले शतक झळकावण्यासाठी तिला ११५ व्या चेंडूपर्यंत प्रतीक्षा करावी लागली. धावगतीला वेग देत रिचा घोषने १६ चेंडूंत २ चौकार आणि २ षटकारांनी २६ धावा फटकावल्या. अष्टपैलू अमनजोत कौरने २ चौकारांनी ८चेंडूंत १५ धावांचे योगदान दिले.
तत्पूर्वी सलामीवीर फोबे लिचफिल्डच्या कारकीर्दीतल्या तिसऱ्या शतकाच्या बळावर ऑस्ट्रेलियाने ४९.५ षटकांत सर्वबाद ३३८ धावा उभारल्या. लिचफिल्डने ९३ चेंडूंत १७ चौकार, ३ षटकारांनी ११९ धावांची शतकी खेळी सजवली. तसेच लिचफिल्डने तिसऱ्या क्रमांकावरील एलिस पेरी (७७ धावा, ६ चौकार, २ षटकार) सोबत दुसऱ्या गड्यासाठी १५५ धावांची भागीदारी रचली. बेथ मूनीने ३ चौकारांनी २४ धावा काढल्या. लिचफिल्ड आणि पेरी बाद झाल्यानंतर अॅश्लेग गार्डनरने ४५ चेंडूंत ४ चौकार, ४ षटकारांनी झटपट ६३ धावा काढत धावसंख्या तीनशेच्या पार पोहचवली. भारताकडून श्री चरणी आणि दीप्ती शर्माने प्रत्येकी २ बळी घेतले.