न्यूयॉर्क : अमेरिकेचे राष्ट्राध्यक्ष डोनाल्ड ट्रम्प हे एच-१ बी व्हिसा उपक्रमाचा बचाव करताना दिसून आले. काही काळापूर्वी या व्हिसाबाबत कठोर भूमिका घेत विदेशी कामगारांना अमेरिकेबाहेर पाठवण्याची भूमिका घेणाऱ्या ट्रम्प यांनी आता अमेरिकेला जगभरातील टॅलेंट अर्थात प्रतिभेची गरज असल्याचे वक्तव्य केले आहे.
अमेरिकेकडे काही क्षेत्रात काम करण्यासाठी प्रतिभासंपन्न लोक नाहीत. त्यामुळे विदेशातून कुशल कामगार आपल्याला आणावे लागतील, असे ट्रम्प यांनी म्हटले आहे. ट्रम्प यांच्या या भूमिकेमुळे भविष्यात भारतीयांना दिलासा मिळण्याची शक्यता आहे.
एका वृत्तवाहिनीला दिलेल्या मुलाखतीमध्ये बोलताना ट्रम्प यांच्या वक्तव्यातून ‘एच-१ बी’ व्हिसाबाबत ते नरमाईची भूमिका
घेत असल्याचे दिसते. मुलाखतीमध्ये विचारण्यात आलेल्या एका प्रश्नाचे उत्तर देताना ट्रम्प यांनी अमेरिकेला विदेशी प्रतिभेची गरज असल्याचे स्पष्टपणे नमूद केले. एच-१बी व्हिसाधारकांची संख्या कमी केली जाईल का? कारण याचा परिणाम अमेरिकन कामगाराच्या वेतनावर होत असल्याचा प्रश्न ट्रम्प यांना विचारण्यात आला होता. यावर ट्रम्प यांनी काही प्रमाणात सहमती व्यक्त केली.परंतु त्याचवेळी अमेरिकेला जगभरातील प्रतिभेची आवश्यकता असल्याचे ते म्हणाले. यावर मुलाखत घेणाऱ्या लॉरा इंग्राहम यांनी आपल्याकडे मोठ्या प्रमाणात प्रतिभांसपन्न लोक असल्याचे म्हटले. मात्र, ट्रम्प यांनी अशी स्थिती नसल्याचे स्पष्ट केले. अमेरिकेकडे काही क्षेत्रात काम करण्यासाठी प्रतिभासंपन्न लोक नाहीत. आपण रांगेतील बेरोजगारांना एखाद्या कारखान्यात क्षेपणास्त्र बनवायला सांगू शकत नाही. यासाठी आपल्याला प्रतिभासंपन्न लोकच लागतील, असे ट्रम्प यांनी म्हटले. विदेशी विद्यार्थ्यांबाबतच्या भूमिकेबाबतही ट्रम्प यांनी यू-टर्न घेतला आहे.
विदेशी विद्यार्थ्यांना अमेरिकेत शिक्षणाची परवानगी देणे आवश्यक आहे. कारण त्यामुळे अमेरिकेची शिक्षण व्यवस्थाच नाही तर विद्यापीठांची आर्थिक स्थितीदेखील मजबूत राहते, असे ट्रम्प यांनी म्हटले. यापूर्वी ट्रम्प यांनी सप्टेंबर महिन्यात एच-१बी व्हिसाबाबत कठोर धोरण स्वीकारले होते. त्यानुसार या व्हिसासाठीचेशुल्क थेट १०० पटीने वाढवत १ हजार डॉलरहून १ लाख डॉलर करण्यात आलेले आहे. त्याचबरोबर या व्हिसाच्या दुरुपयोगाबाबत व्यापक चौकशीदेखील सुरू करण्यात आलेली आहे. अमेरिकेतील तंत्रज्ञान क्षेत्रातील बहुतांश कंपन्या विदेशी कामगारांना नोकरीवर घेण्यासाठी या व्हिसावर अवलंबून असतात.