मुंबई : बिहारच्या निकालानंतर महाराष्ट्रातील काँग्रेस-शिवसेना (ठाकरे गट)-राष्ट्रवादी (शरद पवार) यांच्या आघाडीची मोट फुटल्यात जमा आहे. काँग्रेसने शनिवारी मुंबई महापालिकेच्या निवडणुका स्वबळावर लढण्याची घोषणाच करून टाकली. उद्धव ठाकरे यांच्या शिवसेनेने राज ठाकरे यांच्या महाराष्ट्र नवनिर्माण सेनेसोबत युती करण्याचा घाट घातल्याने काँग्रेसने आघाडीतून बाहेर पडण्याचा निर्णय घेतला आहे. यावर बिहारमधील हास पाहूनही स्वबळावर लढण्याचे सुचत असेल, तर त्यांना कोण थांबवणार, असा सवाल ठाकरे गटाच्या प्रवक्त्या विशाखा पेडणेकर यांनी काँग्रेसला विचारला आहे.
शरद पवार यांनी तर आपल्याकार्यकर्त्यांना स्थानिक पातळीवर निर्णय घ्या, असे सांगून पूर्ण मोकळीकच दिली आहे. यामुळे आता आघाडीत यादवी माजल्याचे चित्र आहे. बिहारमधील निकालानंतर महाराष्ट्रातल्या आघाडीत सन्नाटा पसरला होता. शनिवारपासून आघाडीच्या नेत्यांनी बोलण्यास सुरुवात केली, पण लक्ष्य मात्र एकमेकांनाच केले. मुंबई काँग्रेसचे एकदिवसीय शिबीर अखिल भारतीय काँग्रेस कमिटीचे सरचिटणीस व महाराष्ट्र प्रभारी रमेश चेन्नीथला यांच्या उपस्थितीत पार पडले. यावेळी काँग्रेसच्या नेत्यांची बैठक होऊन मुंबईत स्वबळाचा निर्णय घेण्यात आला. चेन्नीथला यांनी याबाबत घोषणा केली.
उद्धव ठाकरे यांच्या शिवसेनेने राज ठाकरे यांच्या मनसेशी हातमिळवणी करण्याचे जाहीर केल्याने काँग्रेसने आपली नाराजी जाहीरपणे व्यक्त केली. मुंबई काँग्रेसच्या अध्यक्षा वर्षा गायकवाड यांनी मनसेशी जवळीक वाढल्याबद्दल ठाकरे सेनेबद्दल नाराजी व्यक्त केली. काँग्रेसच्या या निर्णयानंतर महाविकास आघाडीच्या अस्तित्वावरच गदा आली असून काँग्रेसचा हा निर्णय योग्य आहे की अयोग्य हे काहीच दिवसांत स्पष्ट होईल, असे किशोरी पेडणेकर यांनी म्हटले आहे. बिहारमधील काँग्रेसचा ऱ्हास पाहून त्यांच्या नेत्यांनी बोध घ्यायला हवा. ज्यांना स्वबळावर लढायचे असेल, त्यांना कुणी थांबवू शकत नाही, मात्र हा निर्णय काँग्रेसच्या वरिष्ठ नेतृत्वाला मान्य आहे काय हे पहावे लागेल, असे पेडणेकर म्हणाल्या.
युती, आघाडीचा निर्णय स्थानिक पातळीवर घ्या – पवार
नगरपालिका आणि नगर पंचायतीच्या निवडणुका अवघ्या काही दिवसांवर आल्या असूनही अजून महाविकास आघाडीचे कुठलेही धोरण ठरलेले नसतानाच शरद पवार यांनीही यातून काढता पाय घेत आपले नेते आणि कार्यकर्त्यांनी स्थानिक पातळीवर कुणाशीही युती वा आघाडी करण्याचा निर्णय घ्यावा, असे सांगत मोकळे रान दिले आहे. प्रसारमाध्यमांशी बोलताना पवार यांनी स्थानिक पातळीवर आपल्या पक्षाच्या कार्यकर्त्यांनी कुणाशीही युती वा आघाडी करावी, त्यास पक्ष नेतृत्वाची काहीही अट नसेल, असे स्पष्ट केले. स्थानिक स्वराज्य संस्थांच्या निवडणुकीत मतदार पक्ष म्हणून नव्हे, तर व्यक्ती पाहून मतदान करतो. त्यामुळे राष्ट्रवादी काँग्रेसच्या नेत्यांना त्या त्या तालुक्यात किंवा जिल्ह्यात स्थानिक परिस्थितीनुसार निर्णय घेण्याचे स्वातंत्र्य देण्यात आले आहे. मुंबई महापालिकेत काँग्रेसने स्वबळावर लढण्याचा निर्णय घेतला तरी त्यात काही आश्चर्य नाही, असे पवार म्हणाले.
काँग्रेसचा विरोध मनसेलाच
शिवसेना (ठाकरे गट) आणि महाराष्ट्र नवनिर्माण सेना मुंबई महापालिका निवडणुका युती करून लढवणार असल्याची चर्चा असून दोन्ही पक्षांच्या नेत्यांच्या भेटीगाठी सुरू झाल्या आहेत. मात्र या युतीला काँग्रेसचा ठाम विरोध आहे. मनसेच्या अनेक गोष्टी आमच्या संस्कृतीला धरून नाहीत, मुंबईत काँग्रेस सातत्याने विकासावरच बोलत आहे, परंतु काही पक्ष नेहमीच मारहाणीची भाषा करत असतात. ते जी असंसदीय भाषा वापरतात, ती आम्हाला मान्य नाही. ही भाषा आमच्या सुसंस्कृतपणाला, आमच्या संस्कृतीला शोभणारी नाही. महाविकास आघाडीतही हीच आमची भूमिका आहे. मविआमध्ये एक किमान समान कार्यक्रम असायला हवा असे आमचे म्हणणे आहे, असे वर्षा गायकवाड म्हणाल्या.
मनसे-शिवसेना हालचालींना वेग
काँग्रेसने स्वबळाचा नारा दिल्यानंतर मनसे-शिवसेना राजकीय हालचालींना यामुळे वेग आला आहे. शिवसेना (ठाकरे) सचिव मिलिंद नार्वेकर यांनी मनसे प्रमुख राज ठाकरे यांची शिवतीर्थ निवासस्थानी शनिवारी भेट घेतली. ही क्रिकेटसंबंधी भेट असल्याचे सांगितले जात असले तरी यामध्ये युतीबाबत पुढील वाटचालीचीही चर्चा झाल्याचे समजते. यानंतर शिवसेना (ठाकरे) व मनसे एकत्र येण्याबाबत आणखी सविस्तर रणनीती तयार करण्यास सुरुवात झाली आहे. मनसे प्रमुख राज ठाकरे यांनी शिवतीर्थ निवासस्थानी पक्षाच्या वरिष्ठ पदाधिकाऱ्यांची तातडीची बैठक घेतली आहे. याच वेळी शिवसेना (ठाकरे) नेते आमदार मिलिंद नार्वेकर यांनी शिवतीर्थ गाठले.