मुंबई : स्थानिक स्वराज्यसंस्थांच्या निवडणुकांच्या तोंडावर शिवसेनेचे स्थानिक पातळीवर राजकीय ताकद असलेले काही नेते, अनेक माजी नगरसेवक तसेच शिवसेनेच्या मंत्री, आमदारांचे राजकीय प्रतिस्पर्धी यांना पक्षात घेण्याचा सपाटा भाजपने लावल्याने शिवसेनेत प्रचंड अस्वस्थता आहे. शिवसेनेच्या मंत्र्यांनी मंगळवारी थेट मंत्रिमंडळ बैठकीवरच बहिष्कार टाकला. नंतर ते आपली नाराजी मांडण्यासाठी थेट मुख्यमंत्री देवेंद्र फडणवीस यांच्या दालनात गेले. मात्र फडणवीस यांनीच या मंत्र्यांना ‘तुम्हीच प्रथम फोडाफोडी केली. या फोडाफोडीचे हेच उत्तर मिळेल’ असे सुनावले. अखेर यापुढे आपापसात फोडाफोडी करायची नाही, असा समझोता होऊन महायुतीतील ही धुसफूस थंडावली. मात्र मुख्यमंत्र्यांच्या दालनात हे होत असतानाच संभाजीनगरचे राजू शिंदे यांचा भाजप प्रवेश झाला आणि त्याचवेळी त्यांनी पक्षाने पाठिंबा द्यावा मी जिल्ह्यातल्या दोन्ही शिवसेना संपवतो, अशी घोषणाच केली.
स्थानिक स्वराज्य संस्थांच्या निवडणुकीत प्रत्येक पक्षाने आपापली ताकद वाढवण्यासाठी जोरदार प्रयत्न सुरू केले आहेत. यातून इतर पक्षांतील नेते, कार्यकर्त्यांना आपल्याकडे घेत ते विजयाचे गणित पक्के करत आहेत. पण यातून राज्यात एकत्रित सत्तेत असलेल्या युतीतील भाजप, शिवसेना, राष्ट्रवादीमध्ये मात्र अंतर्गत वाद वाढत आहेत.
शिवसेना व भाजपमध्ये सध्या एकमेकांचे नेते, कार्यकर्त्यांना घेण्यावरून धुसफूस आहे. उल्हासनगरमधील प्रवेशांपासून याला सुरुवात झाली. येथील भाजपचे माजी नगरसेवक किशोर वनवारी, मीना सोंडे, तसेच टीम ओमी कलाणी गटातील जमनु पुरसवाणी, प्रकाश मखीजा, महेश सुखरानी, चार्ली परवानी यांना शिवसेनेने पक्षात घेतले. त्यानंतर भाजपने प्रत्युत्तरादाखल सेनेचे अनमोल म्हात्रे, महेश पाटील, डॉ. सुनीता पाटील यांना गळाला लावले. या पक्षप्रवेशांच्या मालिकेमुळे महायुतीत खदखद वाढली. मागील काही दिवसांपूर्वी भाजपने कल्याण-डोंबिवलीतील शिवसेनेच्या माजी नगरसेवकांना पक्षप्रवेश दिल्यानंतर शिवसेनेतील मंत्र्यांनी मंगळवारी नाराजी व्यक्त केली. त्यानंतर त्यांनी मुख्यमंत्री फडणवीस यांची भेट घेतली. यावेळी मुख्यमंत्र्यांनी सेनेनेही भाजपचे नगरसेवक घेतले आहेत, मग आम्ही घेतले तर गैर का? असा सवाल करत सेनेच्या मंत्र्यांना सुनावले.
यानंतर मुख्यमंत्र्यांनी आणि उपमुख्यमंत्री एकनाथ शिंदे यांनी मंत्र्यांसोबत बैठक घेतली. यावेळी दोन्ही पक्षांनी एकमेकांच्या कार्यकर्त्यांना पक्षात न घेण्याचा निर्णय घेतल्याचे मंत्री भरत गोगावले यांनी सांगितले. हा प्रश्न दोन-चार दिवसांत मार्गी लागेल, असेही त्यांनी स्पष्ट केले. दरम्यान, या सर्व घडामोडींमध्येही मंगळवारी मंत्री दादा भुसेंचे विरोधक अद्वय हिरे आणि मंत्री संजय शिरसाठ यांचे विरोधक राजू शिंदे यांना महाराष्ट्र प्रदेशाध्यक्ष रवींद्र चव्हाण यांनी भाजपमध्ये प्रवेश दिला. याशिवाय मंत्री भरत गोगावलेंच्या विरोधक स्नेहल जगताप, मंत्री शंभूराज देसाई यांचे विरोधक सत्यजित पाटणकर यांचाही भाजप प्रवेश झालेला आहे.
महायुतीच्या आचारसंहितेचे सर्वांनी पालन करणे गरजेचे आहे. मी स्वतः माझ्या पक्षातील सर्व पदाधिकारी आणि कार्यकर्त्यांना तसेच मुख्यमंत्री देवेंद्र फडणवीस यांनी त्यांच्या सर्व पदाधिकारी आणि कार्यकर्त्यांना सूचना दिल्या आहेत. महायुतीमध्ये कुठेही मिठाचा खडा पडणार नाही. तसेच महायुतीला कुठेही गालबोट लागणार नाही, याची काळजी घेतली जाईल, असे एकनाथ शिंदे यांनी स्पष्ट केले. तसेच आता नाराजीनाट्यावर पडदा पाडला आहे का? असे विचारले असता, हो, मुख्यमंत्री आणि माझी व्यवस्थित चर्चा झाली आहे. तसेच अंतर्गत म्हणजे शिवसेना-भाजप-राष्ट्रवादी काँग्रेस यांच्यातील पक्षप्रवेश केले जाऊ नये, असा निर्णय झाल्याचे ते म्हणाले.
-एकनाथ शिंदे, उपमुख्यमंत्री
बहिष्काराआधी प्री कॅबिनेट
विशेष म्हणजे शिंदे यांचे बहुतेक मंत्री मंत्रालयात उपस्थित होते. त्यांची मंत्रिमंडळ बैठकपूर्व एक बैठकही झाली. यावेळी उपमुख्यमंत्री एकनाथ शिंदेही उपस्थित होते. मात्र मंत्रिमंडळ बैठकीकडे फक्त शिंदे गेले, बाकीचे मंत्री फिरकलेही नाहीत.
दरम्यान, या घडामोडींवर शिवसेना (ठाकरे) पक्षाचे आमदार आदित्य ठाकरे यांनी शिंदे गटावर जोरदार टीका केली. मिंधे टोळीच्या मंत्र्यांनी रुसवे-फुगव्यांमुळे मंत्रिमंडळ बैठकीवर बहिष्कार टाकला, हा महाराष्ट्राच्या जनतेचा अपमान आहे. मंत्रिमंडळ बैठका जनतेचे प्रश्न सोडवण्यासाठी असतात, राग व्यक्त करण्यासाठी नाहीत, असे त्यांनी सोशल मीडियावर म्हटले.
–आदित्य ठाकरे
आमदार शहाजी पाटील यांनी भाजपच्या कार्यपद्धतीवर तीव्र शब्दांत टीका केली आहे. भाजपची वागणूक “हिडीस, किळसवाणी आणि एखाद्या अबलेवर बलात्कार केल्यासारखी” असल्याचे त्यांनी म्हटले आहे. महाराष्ट्राची वैभवशाली राजकीय परंपरा अशा राजकारणामुळे उद्ध्वस्त होईल, अशी भीतीही त्यांनी व्यक्त केली.
–शहाजी पाटील