मुंबई : मुंबईतील गोरेगाव येथे एआयआयएफए (आयफा) आयोजित स्टील महाकुंभकार्यक्रमात महाराष्ट्र शासनाच्या उद्योग विभागाने ९ कंपन्यांशी ८० हजार ९६२ कोटी रुपयांचे सामंजस्य करार केले. या करारामुळे राज्यात ४० हजारांहून अधिक रोजगार निर्मिती होणार आहे. चंद्रपूर, सातारा व नागपूर येथे स्पंज आयर्न, ऑटोमोटिव्ह स्टील पार्ट्स आणि आयएसपी प्रकल्प उभारले जाणार आहेत.मुख्यमंत्री देवेंद्र फडणवीस यांच्या उपस्थित झालेल्या या करारावेळी उद्योग मंत्री डॉ. उदय सामंत, उद्योग सचिव डॉ. पी. अन्बळगन यांच्यासह विविध कंपन्यांचे वरिष्ठ अधिकारी उपस्थित होते. गडचिरोली, चंद्रपूर, नागपूर, वर्धा, रायगड, छत्रपती संभाजीनगर, सातारा आदी जिल्ह्यांत हे प्रकल्प उभारले जाणार आहेत. या गुंतवणुकीमुळे विदर्भ, मराठवाडा आणि कोकणातील औद्योगिक विकासाला गती मिळणार असून, स्थानिकांना मोठ्या प्रमाणावर रोजगाराच्या संधी उपलब्ध होणार आहेत.
अशी होणार गुंतवणूक
गडचिरोलीत सुमेध टूल्स प्रा. लि. आणि हरिओम पाइप इंडस्ट्रीज लिमिटेड यांच्या संयुक्त प्रकल्पांमुळे सुमारे ५,५०० रोजगार उपलब्ध होणार असून, ५,१३५ कोटींची गुंतवणूक होणार आहे.
चंद्रपूर येथे आयकॉन स्टील इंडिया प्रा. लि. ८५० कोटींची स्पंज प्रकल्पामध्ये गुंतवणूक करत असून, यातून १,५०० रोजगार निर्माण होतील.
चंद्रपूरमधील मूल येथे जी. आर. कृश्ना फेरो अलॉय प्रा. लि. हे स्पंज निर्मितीसाठी १,४८२ कोटी रुपयांची गुंतवणूक करत असून, यातून ५०० रोजगार निर्मिती होईल.
नागपूर येथे जयदीप स्टीलवर्क इंडिया प्रा. लि. ही कंपनी आयएसपी प्रकल्पाकरिता १,३७५ कोटी रुपयांची गुंतवणूक करत असून, यातून ६०० रोजगार निर्मिती होणार आहे.
वर्ध्यात रश्मी मेटलर्जिकल इंडस्ट्री प्रा. लि.चा २५,००० कोटींचा एकात्मिक स्टील प्रकल्प येणार असून, यामुळे १२,००० रोजगार मिळणार आहेत.
रायगडमध्ये जिंदाल स्टेनलेस लिमिटेडचा ४१,५८० कोटींचा स्टेनलेस स्टील प्लांट, ज्यामुळे तब्बल १५,५०० रोजगार निर्माण.
वाई येथे फिल्ट्रम अॅटोकॉम्प प्रा. लि. हे १०० कोटी रुपयांची ऑटोमोटिव्ह स्टील पार्टमध्ये गुंतवणूक करत असून, याद्वारे १,२०० रोजगार निर्मिती होणार आहे.