नवी दिल्ली : सांगलीच्या स्मृती मंधानाने ऑस्ट्रेलियाविरोधातील एकदिवसीय मालिकेतील अंतिम आणि तिसऱ्या लढतीमध्ये अवघ्या ५० चेंडूंत विक्रमी शतक झळकावले. मंधानाची वेगवान कामगिरी महिला एकदिवसीय क्रिकेटमधील दुसरे सर्वात जलद शतक ठरले. तसेच डावखुऱ्या मंधानाने ऑस्ट्रेलियाविरुद्ध ५२ चेंडूंत शतक ठोकणाऱ्या विराट कोहलीच्या २०१३ मधील विक्रमाला मागे टाकले. ऑस्ट्रेलियाची मेग लॅनिंग (४५ चेंडू) सर्वात जलद शतक ठोकणाऱ्यांच्या यादीत महिलांत अव्वल स्थानावर आहे.
ऑस्ट्रेलियाकडून दिलेल्या तब्बल ४१३ धावसंख्येचा पाठलाग करताना भारताकडून उप कर्णधार स्मृती मंधाना (६३ चेंडूंत १२५ धावा) विक्रमी शतक झळकावले. कर्णधार हरमनप्रीत कौर (५२) आणि दीप्ती शर्मा (७२) यांनी ही झुंज दिली. मात्र, भारताचा डाव ४७ षटकांत ३६९ धावांत आटोपला आणि ४३ धावांसह अखेरच्या लढतीसोबत एकदिवसीय मालिकाही १-२ अशी गमावावी लागली. गोलंदाजांचा सुमार मारा आणि गचाळ क्षेत्ररक्षण भारताच्या पराभवाचे मुख्य कारण ठरले.
विशाल धावसंख्येचा पाठलाग करताना भारताकडून प्रतिका रावल (१०) आणि हरलीन देओल (११) यांनी निराशा केली. २ बाद ८५ नंतर मंधाना आणि कर्णधार हरमनप्रीत कौर यांनी किल्ला लढवला. ऑस्ट्रेलियन गोलंदाजांच्या दबावाला झुगारुन देत या अनुभवी जोडीने धावफलक हलता ठेवला. यंदाच्या हंगामात खोऱ्याने धावा काढणाऱ्या डावखुऱ्या मंधानाने पुन्हा एकदा आपले कौशल्य दाखवत अवघ्या ५० चेंडूंत शतकाला गवसणी घातली. हरमनप्रीतने (३५ चेंडूंत ८ चौकारांनी ५२ धावा) चांगली साथ देत तिसऱ्या गड्यासाठी १२१ धावा जोडल्या. हरमनप्रीत आणि मंधाना बाद झाल्यानंतर दीप्ती शर्मा आणि स्नेह राणा या तळाच्या फलंदाजांचे प्रयत्न अपुरे पडले. दीप्तीने पुन्हा एकदा आपले अष्टपैलूत्व सिद्ध करत ५८
चेंडूंत ५ चौकार, २ षटकारांनी ७२ धावांचे योगदान दिले, तर राणाने ३ चौकारांनी ३५ धावा काढल्या.तत्पूर्वी, ऑस्ट्रेलियाकडून बेथमुनीने ७५ चेंडूंत २३ चौकार, १ षटकारने १३८ धावांची शानदार खेळी सजवली. कर्णधार एलिस
हिली (३० धावा) परतल्यानंतर जॉर्जिया वोलने दुसऱ्या गड्यासाठी एलिस पेरीसोबत १०७ धावांची भागीदारी (६८ धावा) सोबत रचली. वोलच्या (६८ चेंडूंत ८१ धावा) अर्धशतकी खेळीत १४ चौकारांचा समावेश होता, तर पेरीने ७ चौकार, २ षटकारांनी ६८ धावा काढल्या. मुनीने ५७ चेंडूंत शतक झळकावले. अरुधंती रेड्डी (८६ धावांत ३ बळी), रेणुका सिंग (७९ धावांत २ बळी) आणि दीप्ती शर्मा (७५ धावांत २ बळी) या भारताच्या महागड्या गोलंदाज ठरल्या.
९९ चौकार आणि १२ षटकार
नवी दिल्लीतील अरुण जेटली स्टेडियममध्ये या लढतीच्या निमित्ताने चौकार आणि षटकारांचा वर्षाव पाहण्यास मिळाला. दोन्ही संघांनी एकूण विक्रमी ७८१ धावा उभारल्या. तसेच दोन्ही संघांनी एकूण ९९ चौकार आणि १२ षटकारांची लयलूट केली.
यामध्ये ऑस्ट्रेलियाने सर्वाधिक ६० चौकार ५ षटकार लगावले, तर भारतीयांच्या खात्यात ३९ चौकार आणि ७ षटकार जमा आहेत.
गुलाबी जर्सीद्वारे कर्करोग जागरूकता
स्तन कर्करोगाविषयी जागरूकता निर्माण करण्याच्या उद्देशाने भारतीय महिला खेळाडू गुलाबी रंगाची जर्सी घालून मैदानात उतरल्या. आंतरराष्ट्रीय स्तरावर कर्करोगाविषयी जागरूकता निर्माण करण्यासाठी कोणत्याही राष्ट्रीय संघाने अशा प्रकारची जर्सी परिधान करण्याची ही पहिलीच वेळ आहे.