नवी दिल्ली: अमेरिकेने एच-१ बी व्हिसावर ८८ लाख रुपयांचे शुल्क आकारण्याची घोषणा केल्यानंतर काँग्रेसने या मुद्द्यावरून पंतप्रधान नरेंद्र मोदी यांना लक्ष्य केले. मोदी हे देशाला लाभलेले सर्वात कमकुवत पंतप्रधान आहेत. फक्त गळाभेट घेणे आणि मोदी-मोदींच्या घोषणा द्यायला लावणे हे परराष्ट्र धोरण नाही, अशी तोफ काँग्रेस नेत्यांनी डागली.
लोकसभेतील विरोधी पक्षनेते राहुल गांधी यांनी वर्ष २०१७ मध्ये ट्विटरवर टाकलेली एक पोस्ट पुन्हा शेअर केली आहे. यात त्यांनी मोदी कमकुवत पंतप्रधान असल्याचा आरोप केला होता. हाच धागा पकडून राहुल गांधी यांनी देशाला एक दुबळा पंतप्रधान लाभल्याची टीका पुन्हा एकदा केली. तर फक्त गळाभेट घेणे आणि मोदी-मोदीच्या घोषणा द्यायला लावणे हे परराष्ट्र धोरण नाही, असे टीकास्त्र काँग्रेस अध्यक्ष मल्लिकार्जुन खरगे यांनी डागले. परराष्ट्र धोरणात राष्ट्रीय हिताला सर्वोच्च प्राधान्य दिले पाहिजे. कोणासोबतही मैत्री वाढवताना विवेक व संतुलन राखणे आवश्यक असल्याचे खरगे यांनी म्हटले. ट्रम्प यांनी मोदींना वाढदिवसाच्या दिवशी फोन केला होता. यानंतर ‘अबकी बार,ट्रम्प सरकार’ कडून मोदींना जन्मदिवसाची चांगलीच भेट मिळाली आहे, असा खोचक टोला खरगे यांनी मारला.
एच-१बी व्हिसावरील भरमसाट वार्षिक शुल्काचा सर्वात मोठा फटका भारतीय कर्मचाऱ्यांना बसणार आहे. कारण या व्हिसाधारकांमध्ये ७० टक्के भारतीय असल्याचे खरगे यांनी म्हटले. ट्रम्प यांनी अगोदरच भारतावर ५० टक्के टॅरिफ अर्थात आयात शुल्क लादले आहे. यामुळे भारताला १० वेगवेगळ्या क्षेत्रांमध्ये तब्बल २.१७ लाख कोटी रुपयांचे नुकसान सोसावे लागणार आहे. अमेरिकेने युरोपियन संघाला देखील भारतीय वस्तूंवर १०० टक्के आयात शुल्क लावण्याचे आवाहनही केले आहे. इतकेच नाही तर चाबहार बंदरावर मिळणारी सूटदेखील हटवण्यात आल्याने भारताचे मोठे नुकसान होत असल्याचा दावा खरगे यांनी केला. तर अमेरिकेचा व्हिसासंदर्भातील निर्णय हा भारताच्या सर्वोत्कृष्ट व प्रतिभासंपन्न युवकांच्या भविष्यावर मोठा हल्ला असल्याचे काँग्रेस नेते गौरव गोगोई यांनी म्हटले. यावेळी परराष्ट्र धोरणासंदर्भात माजी पंतप्रधान मनमोहन सिंग यांनी घेतलेल्या निडर भूमिकेचा उल्लेखही त्यांनी यावेळी केला.