मुंबई : खरीप हंगामातील सोयाबीन, उडीद आणि मूग खरेदीसाठी राज्यात मोठ्या प्रमाणावर तयारी करण्यात आली आहे. ३० ऑक्टोबरपासून नोंदणीला सुरुवात होणार असून १५ नोव्हेंबरपासून प्रत्यक्ष खरेदी सुरू होईल. राज्यातील शेतकऱ्यांना उत्पादनाचा योग्य मोबदला मिळावा यासाठी केंद्र सरकारने सोयाबीन खरेदीचे उद्दिष्ट १८ लाख ५० हजार मेट्रिक टन, मूग ३ लाख ३० हजार मेट्रिक टन आणि उडीद ३२ लाख ५६ हजार क्विंटल इतके निश्चित केले आहे, अशी माहिती पणन मंत्री जयकुमार रावल यांनी बुधवारी पत्रकार परिषदेत दिली. तसेच पणन महामंडळ बारदाना खरेदीची प्रक्रिया राबवणार असून यंदा त्याचा तुटवडा भासणार नाही, असेही त्यांनी स्पष्ट केले.
मागील वर्षी राज्यात ११ लाख २१ हजार मेट्रिक टन सोयाबीन खरेदी झाली होती. यंदा राज्यात ७५ लाख मेट्रिक टन उत्पादनाचा अंदाज असून, केंद्राकडे २० लाख मेट्रिक टन खरेदीचा प्रस्ताव देण्यात आला होता. पहिल्या टप्प्यात १८.५ लाख मेट्रिक टन खरेदीस मंजुरी मिळाली असून, गरज भासल्यास खरेदी वाढवली जाईल, असे रावल यांनी सांगितले. खरेदी प्रक्रियेत पारदर्शकता राहावी यासाठी महाराष्ट्र राज्य सहकारी पणन महासंघ, विदर्भ सहकारी पणन महासंघ आणि महाराष्ट्र राज्य
कृषी पणन मंडळ या संस्थांची नोडल संस्था म्हणून नियुक्ती करण्यात आली आहे. तसेच ५६५ खरेदी केंद्रांची संख्या वाढवून
यंदा दुप्पट केली जाणार आहे. तसेच बारदाणाअभावी खरेदीत गोंधळ होऊ नये यासाठी पणन महामंडळाने पुरेसा साठा तयार
ठेवला आहे.
खरेदी केंद्रांवरील गर्दी टाळण्यासाठी अॅप आणि पोर्टलवर नोंदणी तसेच तारीख, वेळ निश्चित करण्याची सोय केली
आहे. जिल्हाधिकारी, तहसीलदार, उपनिबंधक, कृषी अधिकारी आणि पोलीस प्रशासनाचा समावेश असलेल्या दक्षता पथकांची स्थापना करण्यात आल्याचेही रावल यांनी सांगितले.