छत्रपती संभाजीनगर :राज्यात ऑगस्ट-सप्टेंबर महिन्यात झालेल्या मुसळधार पावसामुळे झालेल्या नुकसानीची प्रत्यक्ष पाहणी करण्यासाठी केंद्रीय गृह मंत्रालयाच्या वतीने आंतर-मंत्रालय केंद्रीय पथक (आयएमसीटी) महाराष्ट्रात दाखल होणार आहे. ३ ते ५ नोव्हेंबर या कालावधीत हे पथक राज्यातील पूरग्रस्त व अतिवृष्टीबाधित भागांचा दौरा करून नुकसानाचा आढावा घेणार असल्याची माहिती गृह मंत्रालयाच्या आपत्ती व्यवस्थापन विभागाने दिली आहे.
केंद्रीय गृह मंत्रालयाने ३० ऑक्टोबर रोजी राज्याला या दौऱ्याबाबतचे पत्र पाठवले आहे.आपत्ती प्रतिसाद दल (एनडीआरएफ) व राज्य आपत्ती प्रतिसाद दल (एसडीआरएफ) निकषांन्वये केंद्राकडून मदत मिळवण्यासाठी हा पथकाचा दौरा महत्त्वपूर्ण ठरणार आहे. या पथकात गृह मंत्रालय, कृषी, रस्ते व महामार्ग, ग्रामीण विकास, वीज, पाणीपुरवठा आदी विभागांचे वरिष्ठ अधिकारी सहभागी असतील. हे पथक नुकसानीच्या प्रत्यक्ष आढाव्यासाठी महत्त्वपूर्ण भूमिका बजावेल.
पथकाच्या दौऱ्याच्या तयारीसाठी राज्य सरकारला आवश्यक कागदपत्रे, आकडेवारी आणि प्रत्यक्ष नुकसानाची माहिती सादर करण्याचे निर्देश देण्यात आले आहेत. केंद्रीय गृह मंत्रालयाचे सहसचिव आर. के. पांडेय यांच्या नेतृत्वाखालील आठ जणांचे हे पथक राज्यातील बाधित क्षेत्राची प्रत्यक्ष पाहणी करणार आहे. या पथकातील इतर सदस्यांमध्ये नागपूर येथील कृषी, शेतकरी कल्याण आणि कापूस विकास विभागाचे संचालक डॉ.ए. एल. वाघमारे, केंद्रीय वित्त मंत्रालयाच्या व्यय विभागाचे उपसचिव कन्दर्प व्ही. पटेल, जलशस्ती मंत्रालयाचे संचालक सत्येंद्र प्रताप सिंग, रस्ते वाहतूक आणि महामार्ग विभाग मुंबईचे कार्यकारी अभियंता विशाल पांडे, नवी दिल्लीच्या ग्रामीण विकास मंत्रालयाचे अवर सचिव अभिषेक कुमार, ऊर्जा
मंत्रालयाचे उपसंचालक करण सरीन, अंतराळ विभाग, हैदराबाद, इस्त्रोच्या नॅशनल रिमोट सेन्सिग सेंटर (एनआरएससी) चे वैज्ञानिक डॉ. एसव्हीएसपी शर्मा यांचा या पथकात समावेश राहणार आहे. राज्यातील अनेक जिल्ह्यांत अतिवृष्टीमुळे शेकडो हेक्टर शेत पिके उद्ध्वस्त झाली आहेत. घरे, रस्ते, पूल, शाळा, वीज यंत्रणा यांचे मोठ्या प्रमाणात नुकसान झाले आहे. प्राथमिक अंदाजानुसार कोट्यवधी रुपयांचे नुकसान झाल्याचा अहवाल राज्य सरकारने केंद्राकडे सादर केला आहे. या अहवालावरून प्रत्यक्ष पाहणी करीत अधिकची मदत मिळण्याची शक्यता आहे.
दौऱ्याची रूपरेषा
३ नोव्हेंबर २०२५ रोजी सायंकाळी पथक मुंबईत दाखल होणार आहे. तर ४ नोव्हेंबर २०२५ रोजी राज्यातील प्रमुख पूरग्रस्त जिल्ह्यांचा दौरा करणार आहे. त्यानंतर ५ नोव्हेंबर २०२५ रोजी उर्वरित भागांची पाहणी व राज्य सरकारसोबत चर्चा करणार आहे.
प्रशासनाची लगबग
केंद्रीय पथकाच्या पाहणीचे पत्र येताच राज्य शासनासह संपूर्ण यंत्रणा कामाला लागली आहे. मुख्यमंत्री तथा आपत्ती व्यवस्थापन प्राधिकरणाचे अध्यक्ष यांच्या निर्देशान्वये सर्व संबंधित विभागांनी पथकाच्या दौऱ्याची तयारी सुरू केली आहे. जिल्हाधिकारी, विभागीय आयुक्त यांना पथकासोबत समन्वय साधण्याचे आदेश देण्यात आले आहेत.
राज्य सरकारला सूचना
केंद्रीय गृह मंत्रालयाने या दौऱ्यासाठी राज्य सरकारला विविध विषयांच्या अनुषंगाने माहिती तयार ठेवण्याचे आदेश दिले आहेत.
घरे व इमारती : पूर्णतः कोसळलेली, अंशतः कोसळलेली घरे, पक्क्या घरांचे नुकसान आदींची जिल्हानिहाय आकडेवारी.
कृषी क्षेत्र : पिकांचे नुकसान, बागायती पिके, एसएमएफ/ओएसएमएफ सबसिडीची मागणी.
रस्ते व पूल : राज्य मार्ग, ग्रामीण रस्ते, एनएच अंतर्गत नुकसान.
वीज यंत्रणा : खांब, वाहक, ट्रान्सफॉर्मर यांचे नुकसान.
शाळा व सार्वजनिक इमारती : पूर्णतः /अंशतः नुकसान झालेल्या शाळा, अंगणवाड्या, पंचायत घरांची यादी.
पिण्याच्या पाणीपुरवठा योजना : नुकसान व दुरुस्तीची माहिती.
मत्स्यव्यवसाय व पशुधन : मासळी, पशुधन यांचे नुकसान.
मयत व्यक्तींच्या वारसांना अनुदान, जखमींना वैद्यकीय मदत, जनावरे गमावलेल्यांना नुकसानभरपाई आदी बाबींचाही समावेश असेल.