गेल्या काही वर्षांत क्रेडिट कार्डचा वापर झपाट्याने वाढला आहे. आज लोक किराणा, मोबाईल किंवा इलेक्ट्रॉनिक वस्तूंसारख्या रोजच्या खरेदीसाठीदेखील क्रेडिट कार्डचा वापर करतात. मात्र, यासोबतच सर्वात महत्त्वाची गोष्ट म्हणजे दर महिन्याला क्रेडिट कार्डचे बिल वेळेवर भरणे गरजेचे असते. तुम्ही लक्ष दिले असेल तर टोटल आऊटस्टँडिंग (एकूण थकबाकी) आणि मिनिमम अमाऊंट ड्यू (MAD) अशा क्रेडिट कार्डच्या स्टेटमेंटमध्ये दोन रक्कम दिसतात. याशिवाय, तुमच्याकडे बॅलन्स ट्रान्सफरचा पर्यायही असतो. तर पाहूया, तुमच्यासाठी कोणता पर्याय सर्वात योग्य आहे.
मिनिमम ड्यू म्हणजे काय?
मिनिमम ड्यू पेमेंट म्हणजे ती किमान रक्कम जी बँक तुमच्या बिलावर नमूद करते, म्हणजे कमीत कमी इतकी रक्कम तरी तुम्हाला भरावीच लागते. ही रक्कम साधारणतः एकूण थकबाकीच्या 5 टक्के एवढी असते. हे भरल्याने तुमचे खाते डिफॉल्ट (भरणा न करण्याची स्थिती) होण्यापासून वाचते. पण लक्षात ठेवा, उरलेल्या रकमेवर बँक अत्यंत जास्त व्याज आकारते, जे वार्षिक 35-40% पर्यंत असू शकते. म्हणजेच, जर तुम्ही फक्त मिनिमम ड्यू भरले तर तुमची थकबाकी कमी होण्याऐवजी वाढत जाईल आणि वेळोवेळी तुमचे कर्ज वाढत राहील.
बॅलन्स ट्रान्सफर म्हणजे काय?
बॅलन्स ट्रान्सफर हा पर्याय त्यांच्यासाठी अधिक चांगला आहे ज्यांची थकबाकी खूप वाढली आहे आणि उच्च व्याजदरामुळे त्रास होत आहे. यात तुम्ही तुमची थकबाकी दुसऱ्या बँकेच्या क्रेडिट कार्डवर ट्रान्सफर करू शकता. नवीन बँक सुरुवातीच्या काही महिन्यांसाठी कमी किंवा शून्य व्याजदराची सुविधा देते. यामुळे व्याजाचा भार कमी होतो आणि कर्ज नियोजनबद्ध पद्धतीने फेडण्याची संधी मिळते. मात्र, यासाठी 1-3 टक्क्यांपर्यंत ट्रान्सफर फी लागू शकते आणि ठराविक कालावधीनंतर व्याजदर पुन्हा वाढू शकतो.
कोणता पर्याय योग्य?
जर तुमची थकबाकी खूपच कमी असेल आणि पुढच्या महिन्यात संपूर्ण रक्कम फेडण्याची तुमची क्षमता असेल, तर फक्त मिनिमम ड्यू पेमेंट करणे ही तात्पुरती सोय ठरू शकते. परंतु, जर तुमची देय रक्कम जास्त असेल आणि व्याजाचा भार सहन होत नसेल, तर बॅलन्स ट्रान्सफर हा अधिक शहाणपणाचा निर्णय ठरेल — मात्र तुम्ही ठराविक कालावधीत संपूर्ण भरणा करू शकलात तरच.
लक्षात ठेवण्यासारख्या गोष्टी
आपल्या क्रेडिट लिमिटच्या 30 टक्क्यांपेक्षा जास्त खर्च टाळा.
दर महिन्याला संपूर्ण बिल वेळेवर भरा.
नवीन खरेदी किंवा नवीन कार्ड घेण्यासाठी घाई करू नका.
तुमच्याकडे अनेक कार्ड असतील, तर जुनी कार्ड बंद करू नका कारण त्यामुळे तुमच्या एकूण लिमिटवर आणि क्रेडिट हिस्ट्रीवर परिणाम होतो.
अशा प्रकारे योग्य नियोजन आणि वेळेवर भरणा करून तुम्ही क्रेडिट कार्डचा लाभ घेऊ शकता आणि कर्जाच्या जाळ्यात अडकण्यापासून स्वतःला वाचवू शकता.