नवी दिल्ली : भारताची वस्तू आणि सेवा निर्यात एप्रिल ते ऑक्टोबर २०२५ मध्ये ४.८४ टक्क्यांनी वाढून ४९१.८ अब्ज डॉलरवर पोहोचली आहे, असे सोमवारी सरकारकडून सांगण्यात आले. चालू आर्थिक वर्षात एप्रिल ते ऑक्टोबरदरम्यान एकत्रित निर्यात (माल आणि सेवा) ४९१.८० अब्ज डॉलर्स इतकी होणे अपेक्षित आहे. गेल्या आर्थिक वर्षातील एप्रिल ते ऑक्टोबर २०२४ मध्ये ती ४६९. ११ अब्ज डॉलर्स होती. एप्रिल-ऑक्टोबर २०२५ दरम्यान व्यापारी मालाच्या निर्यातीचे एकत्रित मूल्य २५४.२५ अब्ज डॉलर्स होते. ते एप्रिल-ऑक्टोबर २०२४ दरम्यान २५२. ६६ अब्ज डॉलर्स होते. यामध्ये ०.६३ टक्के वाढ झाली आहे.
वाणिज्य आणि उद्योग मंत्रालयाने जारी केलेल्या आकडेवारीनुसार, एप्रिल-ऑक्टोबरमध्ये एकूण बिगर-पेट्रोलियम निर्यात २१९.९० अब्ज डॉलर्स इतकी झाली आहे. ती एप्रिल-ऑक्टोबर २०२४ मधील २११.६० अब्ज डॉलर्सच्या तुलनेत ३.९२ टक्क्यांनी वाढली आहे. ऑक्टोबरमध्ये
देशाच्या निर्यातीत ऑक्टोबरमध्ये ११.८ टक्के घट होऊन ती ३४.३८ अब्ज डॉलरवर आली. तर व्यापारातील तूट ४१.६८ अब्ज डॉलर झाली आहे. सोमवारी जाहीर झालेल्या सरकारी आकडेवारीनुसार, या महिन्यात आयातीत १६.६३ टक्के वाढ होऊन ती ७६.०६ अब्ज डॉलरवर पोहोचली. सोने-चांदीच्या आयातीत वाढ झाल्याने एकूण आयात वाढली. गेल्या महिन्यात सोन्याची आयात वाढून १४.७२ अब्ज डॉलरवर गेली होती. ऑक्टोबरमध्ये देशाची अमेरिकेला झालेली निर्यात कमी होऊन ६.३ अब्ज डॉलरवर घसरली.
ज्या व्यापारी मालाच्या निर्यातीत प्रामुख्याने वाढ झाली त्यात इलेक्ट्रॉनिक वस्तू, मांस, दुग्धजन्य पदार्थ आणि पोल्ट्री उत्पादने, सागरी उत्पादने, काजू आणि कॉफीचा समावेश आहे.इलेक्ट्रॉनिक वस्तूंच्या निर्यातीत १९.०५ टक्क्यांनी वाढ झाली आहे. मांस, दुग्धजन्य पदार्थ आणि कुक्कुटपालन उत्पादनांच्या निर्यातीत ३०.८७ टक्क्यांनी वाढ झाली आहे.
सागरी उत्पादनांच्या निर्यातीत ११.०८ टक्क्यांनी वाढ झाली आहे. काजूची निर्यात ऑक्टोबर २०२४ मधील ०.०३ अब्ज डॉलर्सवरून १२६.८५ टक्क्यांनी वाढून ऑक्टोबर २०२५ मध्ये ०.०६ अब्ज डॉलर्सवर पोहोचली आहे. शिवाय कॉफीची निर्यात ऑक्टोबर २०२४ मधील ०.१२ अब्ज डॉलर्सवरून १०.९१ टक्क्यांनी वाढून ऑक्टोबर २०२५ मध्ये ०.१३ अब्ज डॉलर्सवर पोहोचली आहे.प्लॅटिनम दागिन्यांच्या आयातीवर निर्बंध
सरकारने सोमवारी काही प्रकारच्या प्लॅटिनम दागिन्यांच्या आयातीवर येत्या ३० एप्रिलपर्यंत निर्बंध घातले आहेत. याआधी सप्टेंबरमध्ये चांदीच्या काही दागिन्यांच्या आयातीवर पुढील वर्षी ३१ मार्चपर्यंत निर्बंध घालण्यात आले होते. थायलंडमधून होणाऱ्या चांदीच्या आयातीला आळा घालण्याचा उद्देश त्यामागे होता. भारताने आसियान (दक्षिण पूर्व आशियाई देशांचा संघ) बरोबर एक मुक्त व्यापार करार केलेला आहे. या दहा राष्ट्रांच्या समूहात थायलंडचाही समावेश आहे. विदेश व्यापारमहासंचालनालयाच्या नव्या अधिसूचनेत म्हटले आहे की, प्लॅटिनम दागिन्यांच्या आयातीचे धोरण तत्काळ प्रभावाने ३० एप्रिल २०२६ पर्यंत मुक्त ऐवजी प्रतिबंधित वर्गवारीत असेल. आयातदारांना यासाठी आता परवाना घ्यावा लागणार आहे.