Bihar Elections : पाटणा : बिहार विधानसभा निवडणुकीसाठी मंगळवारी दुसऱ्या व अंतिम टप्प्यातील मतदान संपल्यानंतर या निवडणुकीच्या संभाव्य निकालाचे एक्झिट पोल्स जाहीर झाले. यात बिहारच्या जनतेने ‘जदयू-भाजप-हम’ यांच्या ‘एनडीए’ आघाडीला स्पष्ट बहुमताने सत्ता मिळणार असल्याचा कौल दिला आहे. तर, मागीलप्रमाणेच ‘राजद-काँग्रेस-डावे-व्हीआयपी’ या महागठबंधनचा पराभव होणार असल्याचे निवडणूक सर्वेक्षणातून समोर आले आहे.
१३ पैकी जवळपास सर्वांनीच एनडीएला सत्ता मिळणार असल्याचा अंदाज वर्तवला आहे. पीपल्स पल्स, पीपल्स इन्साईट, मॅट्रीझ, दैनिक भास्कर, मार्क व जेव्हीसी यांनी केलेल्या सर्वेक्षणानुसार, बिहारच्या मतदारांनी पुन्हा एकदा नितीश कुमार यांच्या नेतृत्वावर विश्वास दाखवला आहे.
सबंध देशाचे लक्ष लागलेल्या बिहार विधानसभा निवडणुकीत बिहारचे मुख्यमंत्री नितीश कुमार यांच्या नेतृत्वाखाली जदयू, भाजप, लोकजनशक्ती पक्ष (रामविलास), हिंदुस्तान आवामी मोर्चा (हम) आणि राष्ट्रीय लोक मोर्चा (रालोमा) यांच्या एनडीए आघाडीचा मोठा विजय होण्याचा अंदाज व्यक्त करण्यात आला आहे. बिहारमधील मतदान संपुष्टात आल्यानंतर जवळपास सर्वच सर्वेक्षण संस्थांनी त्यांच्या एक्झिट पोलमध्ये एनडीए बाजी मारणार असल्याची भविष्यवाणी केली आहे. ‘मॅट्रीज’च्या सर्वेक्षणानुसार, एनडीएला १४७ ते १६७ जागांसह दोन तृतियांश बहुमत मिळू शकते. तर, महागठबंधन केवळ ७० ते ९० जागांपर्यंत मजल मारेल व प्रशांत किशोर यांच्या जन सुराज पक्षाला अवघ्या २ जागा मिळतील, असा अंदाज वर्तवला आहे. ‘दैनिक भास्कर’ने आपल्या सर्वेक्षणात एनडीएला १४५ ते १६० जागा मिळू शकतात, तर महागठबंधन ७३ ते ९१ जागा जिंकेल असे म्हटले आहे. ‘पीपुल्स पल्स’च्या एक्झिट पोलमध्ये एनडीए आघाडी १३३ ते १५९ जागांसह सत्ता पादाक्रांत करणार आहे. तर, महागठबंधनला ७५ ते १०१ जागांवर समाधान मानावे लागेल, असे म्हटले आहे. ‘चाणक्या स्ट्रेटजीज’च्या एक्झिट पोलनुसार, एनडीए १३० ते १३८ जागांसह स्पष्ट बहुमताने सरकार बनवणार आहे. तर, महागठबंधनला १०० ते १०८ जागा मिळणार असल्याचे सांगण्यात आले आहे. दरम्यान, या एक्झिट पोल्सचे अंदाज खरे ठरले तर राष्ट्रीय जनता दल (राजद), काँग्रेस, डावे पक्ष आणि विकासशील इंसान पक्ष (व्हीआयपी) यांच्या महागठबंधनसाठी सत्ता एक दिवास्वप्न ठरणार आहे.बिहार निवडणुकीचा निकाल १४ नोव्हेंबर रोजी (शुक्रवारी) जाहीर होणार आहे.
बिहार निवडणुकीतील सर्वेक्षण निकाल:
सर्वे संस्था एनडीए महागठबंधन इतर
दैनिक भास्कर 145-160 73-91 5-10
मॅट्रिज-आयए एनएस 147-167 70-90 0
पीपुल्स पल्स 133-159 75-101 2-13
पीपुल्स इन्साइट 133-148 87-102 3-8
चाणक्य 130-138 100-108 3-5
पोलस्ट्रेट 133-148 87-102 3-5
जेव्हीसी पोल्स 135-150 88-103 3-6
पोल डायरी 184-209 32-49 1-5
टाइम्स नाऊ 143 95 5
प्रजा पोल 186 50 7
पी मार्क 142-162 80-98 3-8
टीआयएफ रिसर्च 145-163 76-95 3-6
चाणक्या स्ट्रेटजीज 130-138 100-108 3-5
पोल ऑफ पोल्स 154 84 5
बिहारमध्ये रेकॉर्ड ब्रेक ६७.१४ टक्के मतदान
बिहार विधानसभा निवडणुकीत दुसऱ्या व अंतिम टप्प्यात आजपर्यंतचे सर्वात विक्रमी ६७.१४ टक्के मतदानाची नोंद झाली आहे. या टप्प्यात २० जिल्ह्यांतील १२२ मतदारसंघांत मंगळवारी सकाळी ७ ते सायंकाळी ५ वाजेपर्यंत शांततेत मतदान घेण्यात आले. राज्यात गेल्या ६ नोव्हेंबर रोजी झालेल्या पहिल्या टप्प्यात ६५.०९ टक्के मतदान झाले होते. त्यात आणखी २ टक्क्यांची भर पडली आहे. याबरोबरच मतदानाचे आतापर्यंतचे सर्व विक्रम मोडित निघाले आहेत, अशी माहिती निवडणूक आयोगाने दिली आहे. दुसऱ्या टप्प्यातील मतदानासाठी अनेक केंद्रांवर लांबच लांब रांगा लागल्याचे चित्र पाहायला मिळाले आहे. मुस्लिमबहुल किशनगंज जिल्ह्यात या टप्प्यात सर्वाधिक ७६.२६ टक्के मतदान झाले. त्यापाठोपाठ कटिहार (७५.२३ टक्के), पूर्णिया (७३.७९), सुपौल (७०.६९) आणि अररियात ६७.७९ टक्के मतदान झाले. हे सर्व जिल्हे नेपाळ लगतच्या सीमेजवळील कोसी-सीमांचल भागातील आहेत. दुसरीकडे, दक्षिण बिहारमध्ये सुद्धा मतदानाचा टक्का अधिक राहिला. या दुसऱ्या टप्प्यात मुख्यमंत्री नितीश कुमार यांच्या मंत्रिमंडळातील ८ मंत्र्यांसह एकूण १३०२ उमेदवारांच्या भविष्याचा फैसला ईव्हीएममध्ये कैद झाला आहे. बिहार निवडणुकीचा निकाल १४ नोव्हेंबर रोजी (शुक्रवारी) जाहीर होणार आहे.