चंद्रपूर : राज्याची महसूल वाढ आणि महसुली कामात सुसूत्रता आणता यावी, नागरिकांचे प्रश्न जलदगतीने सोडवता यावेत, यासाठी म्हणून सध्या अस्तित्वात असलेल्या जिल्ह्यांचे विभाजन करून नवीन १८ जिल्हे आणि ८१ तालुके करण्यासंबंधीचा प्रस्ताव विचाराधीन असल्याची माहिती महसूल मंत्री चंद्रशेखर बावनकुळे यांनी शनिवारी चंद्रपुरात पत्रकार परिषदेत दिली.
मात्र, सध्याच नवीन जिल्हे किंवा तालुके करण्याचा विचार नाही. जनगणना झाल्यानंतर सर्व परिस्थितीचे आकलन केल्यानंतरच जिथे आवश्यकता आहे, त्याच ठिकाणी नवीन जिल्हा आणि तालुक्यांची निर्मिती करण्यात येईल, असेही बावनकुळे यांनी एका प्रश्नाच्या उत्तरात स्पष्ट केले. नझूलच्या जागेवर गेल्या अनेक वर्षांपासून राहात असलेल्या नागरिकांना अद्यापही प्रॉपर्टी कार्ड मिळालेले नाही. अशा अतिक्रमितधारकांना दिलासा देण्याचा प्रयत्न सरकारकडून केला जात आहे. वर्षभरात ५० टक्के नागरिकांना त्यांच्या हक्काचे प्रॉपर्टी कार्ड देण्याचा प्रामाणिक प्रयत्न केला जाणार आहे. तशी सूचना सर्व जिल्ह्यांच्या जिल्हाधिकाऱ्यांना केली आहे. २० टक्के शेतकरी अजूनही अॅग्रीस्टॅकवर नाहीत. अशा शेतकऱ्यांनी तातडीने आपली नोंदणी करून घ्यावी, असे आवाहन बावनकुळे यांनी केले. जे शेतकरी अॅग्रीस्टॅकवर नाहीत, त्यांना शासनाच्या कोणत्याही योजनेचा लाभ भविष्यात मिळणार नाही. सद्यस्थितीत शेतीविषयकच लाभ दिले जात आहेत. परंतु, यापुढे शासनाच्या सर्व योजना अॅग्रीस्टॅकवर असलेल्या शेतकऱ्यांनाच दिल्या जातील, असेही त्यांनी स्पष्ट केले.
सरकारने राज्याच्या वाळू धोरणात बरेच बदल केले आहेत. भविष्यात नैसर्गिक रेती बंद करण्याचा विचार आहे. किंबहुना, सर्व वाळूघाट बंद केले जातील. त्यामुळे उत्पादित वाळूचा (एम सॅण्ड) उपयोग करण्यासाठी सरकारकडून अनुदान देण्यात येणार असल्याचे त्यांनी सांगितले. राज्यात सध्या मराठा आणि ओबीसी आरक्षणाचा मुद्दा चांगलाच गाजत असून, काँग्रेसचे विधिमंडळ नेते विजय वडेट्टीवार हे आरक्षणाच्या मुद्द्यावरून राजकारण करत असल्याचा आरोप मंत्री चंद्रशेखर बावनकुळे यांनी केला. मराठा
समाजाला कुणबी प्रमाणपत्र देण्याचा जीआर अभ्यास करून काढलेला आहे. मंत्री छगन भुजबळ यांची काही नाराजी असली तरी ती दूर करण्यात येईल. हा जीआर काढताना मंत्रिमंडळाच्या बैठकीत चर्चा झाली होती. त्यानंतरच तो काढण्यात आला. परंतु, ओबीसीच्या आरक्षणावर विजय वडेट्टीवार समाजा-समाजात भांडण लावण्याचा प्रयत्न करत आहेत. त्यांचा डाव लोकांनी समजून घेतला असल्याने तसे काहीही होणार नाही. त्यामुळे वडेट्टीवारांनी हे धंदे बंद करावेत, असेही मंत्री बावनकुळे म्हणाले.