मुंबई : आगामी मुंबई महापालिका आणि स्थानिक स्वराज्य संस्थांच्या निवडणुकीच्या पार्श्वभूमीवर महाविकास आघाडीत (मविआ) मनसेला सहभागी करून घेण्यावरून काँग्रेस, शिवसेना (ठाकरे) आणि राष्ट्रवादी काँग्रेस शरदचंद्र पवार या पक्षांतील मतभेद समोर आले आहेत. राष्ट्रवादीचे अध्यक्ष शरद पवार हे मनसेला सोबत घेण्यासाठी सकारात्मक असून मतांतील फूट टाळण्यासाठी शिवसेना ठाकरे पक्षही यासाठी आग्रही आहे; परंतु मनसेशी जुळवून घेण्यास काँग्रेसचा ठाम नकार कायम आहे. त्यामुळे सध्या मनसेवरून मविआतील घटक पक्षांतील सुंदोपसुंदी वाढलेली दिसत आहे.
महापालिका निवडणूक स्वतंत्र लढण्याची भूमिका जाहीर केल्यानंतर मविआच्या भविष्याबाबत प्रश्नचिन्ह निर्माण झालेले असताना दुसरीकडे मविआची फाटाफूट रोखण्यासाठी शरद पवार सक्रिय झाले आहेत. मनसेला मविआसोबत घेण्यासाठी पवार सकारात्मक असून त्यांनी काँग्रेस नेत्यांशी फोनवरून चर्चा केल्याचे समजते. मात्र, आक्रमक मराठी बाणा आणि हिंदुत्वाची भूमिका स्वीकारलेल्या मनसेला सोबत घेतल्यास काँग्रेसचा पारंपरिक दलित, मुस्लिम, अमराठी मतदार दुरावण्याची भीती असल्याने काँग्रेस नेत्यांचा मनसेच्या मविआतील सहभागाला विरोध कायम आहे. मनसेवरून काँग्रेसने स्वतंत्र लढण्याची भूमिका जाहीर केली असली, तरी काँग्रेस समविचारी पक्षासोबत आघाडी करण्यासाठी तयार असल्याचे समजते. त्याच
दृष्टीने मनसेची साथ सोडा आणि आमच्यासोबत या, अशी ऑफर काँग्रेसच्या मुंबई अध्यक्षा खासदार वर्षा गायकवाड यांनी उद्धव ठाकरे यांना दिल्याचे समजते.
मनसे स्वतंत्र, ‘मविआ ‘च्या चर्चाशी देणे-घेणे नाही – संदीप देशपांडे
महाराष्ट्र नवनिर्माण सेना ही महाविकास आघाडीचा भाग नाही. आमचा पक्ष स्वतंत्र असून त्यांचा निर्णय राज ठाकरे हे घेतात. त्यामुळे वर्षा गायकवाड आणि शरद पवार काय बोलतात, उद्धव ठाकरे हे वर्षा गायकवाड यांना काय बोलतात, याच्याशी आम्हाला काहीही देणे-घेणे नाही, आमच्या पक्षाची भूमिका काय हे योग्य वेळी राज ठाकरे जाहीर करतील, अशी भूमिका मनसेचे मुंबई शहराध्यक्ष संदीप देशपांडे यांनी मांडली.
शिवसेना (ठाकरे) मनसेची साथ सोडायला तयार नाही. ठाकरेंच्या शिवसेनेने मनसेची साथ न सोडल्यास काँग्रेस मुंबईत राष्ट्रवादी शरदचंद्र पवार पक्ष, कम्युनिस्ट पक्ष, रिपाइं आदी छोट्या पक्षांना एकत्र करून आघाडी करण्याच्या प्रयत्नात आहे. त्याअनुषंगाने सोमवारी काँग्रेस पक्षाची महत्त्वाची बैठक पार पडणार आहे. या बैठकीत शरद पवार यांच्या भूमिकेबाबत चर्चा होण्याची शक्यता आहे.
‘मतदार यादीतील घोळ आणि मतचोरीच्या मुद्द्यावर मविआ-मनसे एकत्र येऊन सत्याचा मोर्चा काढतात, मग निवडणूक वेगळी का लढायची?’ असा सवाल पवार यांनी उपस्थित केल्याची चर्चा आहे.