बंगळुरू : केवळ सत्ता मिळवण्यासाठी नव्हे तर देशाची प्रतिष्ठा वाढवण्यासाठी आम्हाला हिंदू समाज एकजूट करायचा आहे. भारतासाठी फक्त हिंदूच जबाबदार आहेत. देशात कोणीही अहिंदू नाही. कारण भारत भूमीवरील सर्वांचे पूर्वज एकच असून, देशाची मूळ संस्कृती हिंदू आहे, असे प्रतिपादन सरसंघचालक मोहन भागवत यांनी रविवारी केले. इतिहासात संघावर तीन वेळा बंदी घालण्यात आली. त्यानंतर मान्यता मिळाली. राष्ट्रीय स्वयंसेवक संघ अर्थात आरएसएस भगव्या ध्वजाला गुरू मानतो. परंतु, संघ राष्ट्रध्वज तिरंग्याचाही सन्मान करतो, असे भागवत यांनी अधोरेखित केले.
कर्नाटकची राजधानी बंगळुरू येथे राष्ट्रीय स्वयंसेवक संघाच्या दोनदिवसीय व्याख्यानमालेला सरसंघचालक मोहन भागवत यांनी संबोधित केले. ‘संघाचा शंभर वर्षांचा प्रवास; नवे क्षितीज’ या विषयावर बोलताना ते म्हणाले की, आजघडीला संघ भारतासह अनेक देशांत समाजसेवा करीत आहे. संघाला व्यक्तींचा समूह म्हणून मान्यता देण्यात येते. संघाची १९२५ साली स्थापना झाली. पण, ब्रिटिश सरकार तेव्हा नोंदणी करीत होते का? असा सवाल सरसंघचालकांनी उपस्थित केला. संघाला मान्यता नाही, असा आरोप काँग्रेस व इतर पक्ष करतात. पण, इतिहासाची पाने चाळली तर संघावर तीन वेळा बंदी घालण्यात आली होती. त्यानंतर कुठे संघाला मान्यता मिळाली. जर आम्ही नसतो तर कोणावर बंदी घातली? अशी कोणती गोष्ट आहे जी नोंदणीकृत नाही. हिंदू धर्माचीसुद्धा नोंद नाही. मात्र, आमचा संघ समूहाच्या श्रेणीत मोडतो. आमचे संघटन लोकप्रिय आहे. आयकर विभाग व न्यायालये संघाच्या लोकांना समूह मानतात. आमच्या संघाला आयकरमधून सूट आहे, असे मोहन भागवत म्हणाले.
संघ भगव्या ध्वजाला मानतो, तिरंग्याला नाही. या मुद्द्यावर भाष्य करताना संघ भगव्या ध्वजाला गुरू मानतो. मात्र, आम्ही तिरंग्याचा खूप सन्मान करतो, असे भागवत यांनी नमूद केले. संघाने नेहमीच विरोध पत्कारला. पण, संघ थांबला नाही. १०० वर्षांचा प्रवास पूर्ण करणे सोपे नाही. या दरम्यान असंख्य स्वयंसेवकांची हत्या झाली. तरीही स्वयंसेवक आजही निस्वार्थपणे समाजसेवा करीत आहेत. आता पुढील टप्प्यात खेड्या-पाड्यांत संघाचा विस्तार करणे आमचे उद्दिष्ट आहे. भारत विविधतेने नटलेला देश आहे. म्हणून येथील समाजाला एकसूत्रात बांधणे आपले कर्तव्य असल्याचे भागवतांनी सांगितले.
आम्ही संविधान विरोधी नाही
भारताला ब्रिटिशांनी घडवले नाही. भारत हा प्राचीन देश आहे. भारत ही ब्रिटिशांची देण नाही. भारताची मूळ संस्कृती शोधली तर आपण ‘हिंदू’ या शब्दांपर्यंत पोहोचतो. हिंदू असणे ही भारताविषयीची जबाबदारी आहे. भारताचे हिंदू राष्ट्र बनणे संविधान विरोधी नाही. आम्ही संविधान विरोधी नाही. तर, आम्हीसुद्धा संविधानाचे पालन करतो. समाजाला जोडणे हे संघाचे उद्दिष्ट आहे, असे सरसंघचालक मोहन भागवत यांनी नमूद केले.