New York Mayor Election : न्यूयॉर्क :अमेरिकेच्या न्यूयॉर्क शहराच्या महापौरपदाच्या निवडणुकीत भारतीय वंशाच्या जोहरान ममदानी यांनी इतिहास घडवला आहे. राष्ट्राध्यक्ष डोनाल्ड ट्रम्प यांच्या प्रखर विरोधानंतरही त्यांनी महापौरपदाच्या निवडणुकीत विजय मिळवला आहे.
युगांडामध्ये जन्मलेले आणि न्यूयॉर्कमध्ये वाढलेले 34 वर्षीय ममदानी हे न्यूयॉर्क विधानसभेचे सदस्य असून, डेमोक्रॅटिक पक्षाचे नेते आहेत. ममदानी यांचा सामना स्वतंत्र उमेदवार म्हणून निवडणूक लढवणारे न्यूयॉर्कचे माजी राज्यपाल अँड्रयू कुओमो आणि रिपब्लिकन पक्षाचे उमेदवार कर्टिस स्लिवा यांच्याशी होता. त्या दोघांनाही त्यांनी धुळ चारली.
जोहरान ममदानी यांना ९,४८,२०२ मते मिळाली. अपक्ष उमेदवार अँड्रयू कुओमो यांना ७,७६,५४७ आणि कर्टिस स्लिवा यांना १,३७,०३० मतदान झाले. २० लाखांहून अधिक मतदारांनी मतदानाचा हक्क बजावला. दरम्यान या विजयामुळे जोहरान ममदानी न्यूयॉर्क शहराचे पहिले मुस्लीम आणि सर्वात तरूण महापौर बनले आहेत.
शहराचे माजी महापौर एरिक अॅडम्स यांनी सप्टेंबर महिन्यात महापौर पदाच्या शर्यतीतून माघार घेतली होती. त्यांच्या कार्यकाळात अनेक प्रशासकीय वाद निर्माण झाले होते. दरम्यान, अमेरिकेचे माजी राष्ट्राध्यक्ष डोनाल्ड ट्रम्प यांनी न्यूयॉर्कमधील मतदारांना इशारा देताना दावा केला होता की, जर डेमोक्रॅटिक पक्षाचे उमेदवार जोहरान ममदानी हे निवडून आले, तर न्यूयॉर्कमध्ये आर्थिक आणि सामाजिक गोंधळ निर्माण होईल आणि शहराचे अस्तित्वच धोक्यात येईल. ट्रम्प यांनी या पदासाठी अधिकृतरित्या कुओमो यांना समर्थन दिले होते.
जर ममदानी महापौर झाले, तर ते न्यूयॉर्क शहराला अत्यंत कमी प्रमाणात केंद्र सरकारकडून निधी मिळवून देतील, असे ट्रम्प यांनी निवडणुकीच्या पूर्वसंध्येला सोमवारी त्यांच्या सोशल मीडिया प्लॅटफॉर्म ‘ट्रुथ सोशल’वर लिहिले आहे.
महापौर पदाची निवडणूक 4 नोव्हेंबर रोजी पार पडली, मतदान सकाळी सहा वाजल्यापासून रात्री नऊ वाजेपर्यंत सुरू होते. 25 ऑक्टोबरला सुरू झालेले प्रारंभिक मतदान रविवारी पूर्ण झाले.
प्रसिद्ध भारतीय चित्रपट निर्माती मीरा नायर आणि भारतीय वंशाचे युगांडातील लेखक महमूद ममदानी यांचे पुत्र जोहरान ममदानी यांनी डेमोक्रॅटिक पक्षाच्या प्राथमिक निवडणुकीतच कुओमो यांना पराभूत केले होते.
न्यूयॉर्क टाइम्सच्या वृत्तानुसार, अमेरिकेचे माजी राष्ट्राध्यक्ष बराक ओबामा यांनी शनिवारी ममदानी यांना फोन करून, त्यांची निवडणूक प्रचार मोहीम पाहण्यासारखी होती असल्याचे म्हटले होते.
‘हिंदूज फॉर ममदानी’ नावाच्या एका संस्थेने शनिवारी ममदानी यांच्या समर्थनार्थ प्रार्थना सभा आयोजित केली. यावेळी त्यांच्या सुरक्षेसाठी आणि यशासाठी प्रार्थना करण्यात आली.
या कार्यक्रमाला संबोधित करताना मीरा नायर म्हणाल्या होत्या की, त्यांच्या मुलाचा निवडणूक प्रचार हा कोणत्याही एका धर्मासाठी किंवा समुदायासाठी नसून, सर्व न्यूयॉर्ककरांसाठी आहे. धर्म आणि मतभेदांच्या पलीकडे आपली एकता हीच या शहराची खरी ताकद आहे. मला आशा आहे की जोहरान आशा, धैर्य आणि प्रेम घेऊन या शहरासाठी एक नवी पहाट आणेल, अशा भावना त्यांनी व्यक्त केल्या होत्या.
जोहरान ममदानी कोण आहेत?
जोहरान ममदानी हे सध्या अमेरिकन राजकारणातील एक उदयोन्मुख आणि प्रभावशाली व्यक्तिमत्त्व मानले जातात. त्यांचा जन्म युगांडातील कंपाला येथे झाला, आणि तिथेच त्यांचे बालपणही गेले. जोहरान यांचे पालक आंतरराष्ट्रीय स्तरावर प्रसिद्ध व्यक्ती आहेत — त्यांचे वडील महमूद ममदानी हे युगांडातील प्रख्यात समाजशास्त्रज्ञ आणि लेखक आहेत, तर आई मीरा नायर या भारतातील सुप्रसिद्ध चित्रपट निर्माती आणि दिग्दर्शिका म्हणून ओळखल्या जातात.
जोहरान वयाच्या सातव्या वर्षी आपल्या पालकांसोबत न्यूयॉर्कला स्थलांतरित झाले. तिथेच त्यांनी शिक्षण घेतले आणि पुढे सामाजिक कार्य, न्याय आणि नागरिकांच्या हक्कांसाठी आवाज उठविण्याचा मार्ग निवडला. २०१८ मध्ये त्यांनी अमेरिकन नागरिकत्व मिळवले. वैयक्तिक आयुष्यात, त्यांनी सीरियन कलाकार रामा दुवाजीशी विवाह केला असून, हे दाम्पत्य त्यांच्या सामाजिक आणि सांस्कृतिक विचारांसाठीही प्रसिद्ध आहे.