नवी दिल्ली : बिहार विधानसभा निवडणुकीतील ऐतिहासिक विजय हा एनडीएचा नाही तर लोकशाहीचा विजय आहे. बिहारच्या विजयाने ‘एमवाय-महिला व यूथ’ हा विजयाचा नवा फॉर्म्युला दिला असून जंगलराजवाल्यांचा सांप्रदायिक फॉर्म्युला जनतेने सपशेल नाकारला आहे, असे पंतप्रधान नरेंद्र मोदी शुक्रवारी एनडीएच्या विजयोत्सवाच्या कार्यक्रमात म्हणाले. २०१० नंतर बिहारमध्ये सर्वात मोठा जनादेश एनडीएला मिळाला असल्याचे नमूद करत त्यांनी या दणदणीत विजयाबद्दल राज्यातील माता-भगिनींसह सर्व जनतेचे आभार मानले. या विजयासाठी झटणारे कार्यकर्ते, नेते व सर्व घटक पक्षांचे त्यांनी अभिनंदन केले. तसेच आगामी पश्चिम बंगाल विधानसभा निवडणुकीत ममता बॅनर्जीचे जंगलराज संपुष्टात आणण्याचे आवाहन करत त्यांनी आता भाजपचे आगामी निवडणूक लक्ष्य स्पष्ट केले.
दिल्ली भाजप मुख्यालयात शुक्रवारी संध्याकाळी बिहारमधील विजयाचा जल्लोष साजरा करण्यात आला. मुख्यालयात प्रवेश करताना मोदींनी गमछा हलवून कार्यकर्त्यांना अभिवादन केले. याप्रसंगी कार्यकर्त्यांना संबोधित करताना मोदींनी या ऐतिहासिक विजयाबद्दल बिहारच्या जनतेचे आभार मानत काँग्रेस-राजद आघाडीवर सडकून टीका केली. आपल्या भाषणाची सुरुवात
छटमातेच्या जयघोषाने केली. बिहारच्या लोकांनी विरोधकांचा गर्दा उडवला अर्थात सुपड़ा साफ करून टाकल्याचे मोदी म्हणाले. जनतेने विरोधकांची दाणादाण उडवून दिली. भारतरत्न कर्पूरी ठाकूर यांच्या गावातूनच मी प्रचाराची
सुरुवात केली होती. त्यावेळी आपण लोकांना एनडीएला विक्रमी मतदान करण्याचे आवाहन केले होते. त्यानुसार बिहारमधील माता-भगिनींसह सर्वांनी एनडीएच्या झोळीत भरभरून मतदान टाकल्याचे मोदी म्हटले. हा विजय एनडीएचा नाही तर लोकशाहीचा आहे. या निकालातून आयोगावरील जनतेचा विश्वास अधोरेखित झाला आहे. राज्यात तुष्टीकरणाची जागा संतुष्टीकरणाने घेतली असल्याचे मोदी म्हणाले. या विजयाने आपल्या खांद्यावरील जबाबदारी वाढली असून बिहारचा सर्वांगीण विकास करण्याचे आश्वासन त्यांनी यावेळी दिले. या निवडणुकीत लोकशाही आणि लोकशाही संस्थांवर हल्ला करणाऱ्यांचा पराभव झाला आहे. आता बिहारमध्ये जंगलराजची वापसी कधीही होणार नाही.
छटपूजेचा अवमान करणाऱ्यांना जनतेने चांगला धडा शिकवला असल्याची तोफ मोदींनी डागली. लोकसभा निवडणुकीनंतर एनडीएला अनेक राज्यांत यश मिळाले आहे. यात हरयाणा, महाराष्ट्र आणि दिल्लीचा समावेश असल्याचे त्यांनी नमूद केले. देशाच्या प्रत्येक भागात लोक एनडीएकडे विश्वास व आशेच्या नजरेने पाहत आहेत. भारत आता खऱ्या सामाजिक न्यायासाठी मतदान करत असल्याचा दावा त्यांनी यावेळी केला. त्याचबरोबर काँग्रेसचे राजकारण नकारात्मकने भरलेले असून त्यांच्याकडे देशासाठी दूरदृष्टिकोन नसल्याची टीका त्यांनी केली. आज आम्ही जितक्या जागा जिंकल्या आहेत, तितक्या जागा काँग्रेसला मागच्या सहा निवडणुकीत देखील जिंकल्या आल्या नसल्याची खोचक टीका त्यांनी केली. जनतेने राजदचा सांप्रदायिक मुस्लिम-यादव (एमवाय) फॉर्म्युला फेटाळून लावत महिला व युवक असा नवीन फॉर्म्युला दिल्याचे मोदी म्हणाले. निकालाने मतचोरीचे
आरोप फेटाळून लावले आहेत. मतदार विशेष करून युवक मतदार यादीतील फेरपडताळणीला गांभीर्याने घेत आहेत. युवकांनी या प्रक्रियेला जोरदार पाठिंबा दर्शवल्याचे मोदींनी म्हटले. तर आगामी पश्चिम बंगाल, केरळ आणि तामिळनाडू विधानसभा निवडणुकीचा उल्लेख करत भाजप कार्यकर्त्यांना पूर्ण ताकदीने कामाला लागण्याचे आवाहन त्यांनी केले.