नवी दिल्ली: देशातील काही वैद्यकीय महाविद्यालयांशी संबंधित कथित लाचखोर आणि अनियमितताप्रकरणी मनी लाँडरिंगच्या संशयावरून महाराष्ट्रासह दहा राज्यांमध्ये गुरुवारी अंमलबजावणी संचालनालयाने (ईडी) धाडी घातल्या. महाराष्ट्र, तेलंगणा, आंध्र प्रदेश, मध्य प्रदेश, छत्तीसगड, गुजरात, राजस्थान, बिहार, उत्तर प्रदेश आणि दिल्लीतील किमान १५ ठिकाणांवर धाडी टाकत झडती घेण्यात आली. यामध्ये सात मेडिकल कॉलेज आणि काही निवासस्थाने, कार्यालयांचा समावेश आहे.
वैद्यकीय महाविद्यालयांच्या निरीक्षणाशी संबंधित गोपनीय माहिती संबंधित महाविद्यालयांच्या व्यवस्थापनास व दलालांना देण्याच्या मोबदल्यात आरोग्य मंत्रालयाचे अधिकारी व राष्ट्रीय वैद्यकीय आयोगाच्या अधिकाऱ्यांना लाच देण्यात आल्याचा आरोप आहे. यामुळे संबंधित वैद्यकीय महाविद्यालयांच्या व्यवस्थापनाला मापदंडांमध्ये फेरबदल करण्यास आणि शैक्षणिक अभ्यासक्रम चालवण्यासाठी मंजुरी मिळवण्यात मदत झाली. याप्रकरणी सीबीआयने ३० जून रोजी गुन्हा दाखल केला होता. केंद्रीय आरोग्य मंत्री, वैद्यकीय आयोगाचे अधिकारी, दलाल वमहाराष्ट्रासह दहा राज्यांमध्ये ईडीच्या धाडी खासगी वैद्यकीय महाविद्यालयांच्या प्रतिनिधींच्या एका नेटवर्कचा भंडाफोड करण्यात आल्याचा सीबीआयचा दावा आहे.
सीबीआयने दाखल केलेल्या एफआयआरमध्ये ३४ लोकांचा समावेश आहे. यामध्ये आरोग्यमंत्रालयाचे आठ अधिकारी, राष्ट्रीय आरोग्य प्राधिकरणाचा एक अधिकारी व वैद्यकीय आयोगाच्या निरीक्षण पथकातील पाच डॉक्टरांचा समावेश आहे. सीबीआयच्या एफआयआरनुसार या नेटवर्कचे मूळ आरोग्य मंत्रालयातआहे. मंत्रालयातील अधिकाऱ्यांनी दलालांना हाताशी धरून वैद्यकीय महाविद्यालयांपर्यंत निरीक्षण, मंजुरीशी संबंधित अत्यंत गोपनीय व संवेदनशील माहिती पुरवली. त्या बदल्यात या अधिकाऱ्यांनी महाविद्यालयांकडून मोठ्या प्रमाणात लाच घेतली.