नवी मुंबई : हरमनप्रीत कौरच्या नेतृत्वाखाली भारतीय महिला संघाने प्रथमच एकदिवसीय विश्वचषकाचा किताब पटकावत ऐतिहासिक क्रांती घडवली. डॉ. डी. वाय. पाटील स्टेडियममध्ये भारताने असंख्य चाहत्यांच्या उपस्थितीत रोमहर्षक झालेल्या अंतिम फेरीत दक्षिण आफ्रिकेचा ५२ धावांनी धुव्वा उडवला. भारताचे २९९ धावांचे आव्हान सर करताना पाहुण्या संघाकडून कर्णधार लॉरा वोल्वाडर्टचा (१०१) अपवाद वगळता एकाही फलंदाजाला मोठी धावसंख्या उभारता आली नाही आणि त्यांचा डाव ४५.३ षटकांत २४६ धावांत आटोपला. पाहुण्यांचा अखेरचा बळी घेतल्यानंतर भारतीय खेळाडूंनी मैदानात धाव घेत बेभान होऊन विजयी जल्लोष साजरा केला. पुरुषांप्रमाणे दक्षिण आफ्रिकेचा महिला संघही पुन्हा एकदा ‘चोकर्स’ ठरला. ३९ धावांच्या मोबदल्यात ५ बळी घेणारी – अष्टपैलू दीप्ती शर्मा आणि ८७ धावा काढत – २ बळी घेणारी शेफाली वर्मा विजयाची – शिल्पकार ठरली.
फलंदाजीसाठी निमंत्रित करण्यात आलेल्या भारताने शेफाली वर्मा (७८ चेंडूंत ८७ धावा, ७ चौकार, २ षटकार) आणि दीप्ती शर्माच्या (५८ चेंडूंत ५८ धावा, ३ चौकार, १ षटकार) अर्धशतकी खेळीच्या बळावर ७ बाद २९८ अशी मजल मारली. शेफालीने जोडीदार स्मृती मंधानासोबत १७.४ षटकांत १०४ धावांची शानदार सलामी उभारून दिली. पावसामुळे खेळपट्टी ओली असेल आणि चेंडू बॅटवर येणार नाही, असा अंदाज होता. मात्र, डॉ. डी. वाय. पाटील स्टेडियममधील कर्मचाऱ्यांच्या योग्य व्यवस्थापनाने मैदान खेळण्यास सुसह्य झाले. त्यानंतर फलंदाजीला पोषक खेळपट्टीवर मंधाना-शेफालीने पहिल्या पॉवरप्लेमध्ये ६४ धावा जोडल्या. शेफालीने ४ जुलै २०२२ नंतर आपले पहिले अर्धशतक ४९ व्या चेंडूवर झळकावले. भारताकडून यंदा सर्वाधिक धावा काढणारी मंधाना (५८ चेंडूंत ४५ धावा, ८ चौकार) विश्वचषकातील तिसऱ्या अर्धशतकापासून ५ धावांनी दर राहिली ५७ धावांवर मिळालेल्या जीवदानाचा लाभ घेत शेफालीने आपल्या धावसंख्येत भर घातली. उपांत्य फेरीतील
भारताच्या विजयाचा शिल्पकार ठरलेल्या जेमिमा रॉड्रिग्जने त्यानंतर शेफालीसोबत धावगती कायम राखली. पायाचे स्नायू आखडल्यानंतर शेफालीने प्राथमिक उपचार करून घेतले. मात्र, या दुखापतीमधून मानसिकरीत्या शेफाली सावरली नाही आणि अखेरीस तिला वेगवान गोलंदाज अयाबोंगा खाकाने क्षेत्ररक्षक सून लूसकडे झेल देण्यास भाग पाडले. ३७ चेंडूंत १ चौकाराने २४ धावांची धिमी खेळी उभारणारी रॉड्रिग्ज आफ्रिकेच्या खाकाची दुसरी शिकार ठरली. मधल्या फळीतील हरमनप्रीत कौर आणि दीप्ती शर्माने धावफलक हलता ठेवला. डावखुरी फिरकीपटू नॉनकुलुलेको म्लाबाने २० धावांवर कौरचा बचाव भेदला. मध्यम वेगवान गोलंदाज नंदिन डी क्लार्कने आपल्याच गोलंदाजीवर अमनज्योत कौरचा (१२) झेल घेतला. पाच षटकांच्या अंतरात दोन फलंदाज बाद झाल्यामुळे धावगती मंदावली. दीप्तीने ५३ चेंडूंत भारताकडून अंतिम फेरीतील दुसरे अर्धशतक झळकावताना रिचा घोषसोबत सहाव्या गड्यासाठी ४७ धावा जोडल्या. यामध्ये घोषचा वाटा होता ३ चौकार, २ षटकारांसह ३४ धावांचा. आफ्रिकन गोलंदाजांनी अखेरच्या १० षटकांमध्ये पुनरागमन करत भारताला तीनशेच्या आतमध्ये रोखले. पाहुण्या संघाकडून खाकाने सर्वाधिक ३ बळी घेतले.
ताजमिन ब्रिट्स आणि कर्णधार लॉरा वोल्वाडर्ट यांनी भारतीय माऱ्याचा समर्थपणे सामना करत अर्धशतकी भागीदारी रचली. अमनज्योत कौरने चपळ क्षेत्ररक्षणाचा नमुना दाखवत ब्रिट्सला (२३ धावा, २ चौकार, १ षटकार) धावचीत केले. डावखुरी फिरकीपटू श्री चरणीने तिसऱ्या क्रमांकावरील एनिके बॉशला शून्यावर पायचीत पकडले. वोल्वाडर्ट – सून लूस जोडी भारताच्या मुख्य गोलंदाजांना जुमानत नव्हती. या परिस्थितीत कर्णधार कौरने ‘पार्ट टाईम’ गोलंदाज शेफालीकडे २१ वे षटक सोपवले. आश्चर्य म्हणजे लूस (२५) जाळ्यात अडकली आणि शेफालीच्या हाती सोपा झेल देत परतली. शेफालीने त्यानंतरच्या पुढील षटकात मारिझेन कापला (४) बाद करत
1
आफ्रिकेला चौथा धक्का दिला. सिनोला जाप्ताच्या (१६) स्वरूपात आफ्रिकेने पाचवा फलंदाज १४८ धावांवर गमावला. वोल्वाडर्टने त्यानंतर एनेरी डर्कसनला साथीला घेत खिंड लढवली. मात्र, दीप्तीचा यॉर्कर डर्कसन (३५ धावा, १ चौकार, १ षटकार) समजू शकली नाही आणि ६१ धावांच्या भागीदारीचा अंत झाला. एक बाजू लावून धरणाऱ्या वोल्वाडर्टने ९६ व्या चेंडूवर शतक झळकावले. मात्र त्यानंतर टोलेजंग फटका मारण्याच्या नादात वोल्वाडर्टनचा (११ चौकार, १ षटकार) अमनज्योत कौरने तिसऱ्या प्रयत्नात झेल घेतला. त्यानंतर आफ्रिकेच्या डावाला गळती लागली.
विश्वचषकात सर्वाधिक षटकार लगावण्याच्या पंक्तीत रिचा घोष संयुक्तरीत्या अग्रस्थानावर उभी आहे. रिचासोबत डायंड्रा डॉटिन आणि लिझेल लीच्या खात्यात १२ षटकार जमा आहेत.
भारताची ७ बाद २९९ ही विश्वचषक अंतिम फेरीतील दुसरी सर्वोच्च धावसंख्या ठरली. ऑस्ट्रेलियाने २०२२ विश्वचषकाच्या अंतिम फेरीत इंग्लंडविरुद्ध विक्रमी ५ बाद ३५६ धावसंख्या उभारली होती.
पावसामुळे २ तास विलंबाने खेळाला सुरुवात झाली. मात्र, यामुळे षटके कमी करण्यात आली नाहीत आणि सामना ५० षटकांचा खेळवण्याचा निर्णय घेण्यात आला. पावसानंतर निर्माण झालेली अनुकूल परिस्थिती पाहता दक्षिण आफ्रिकेने नाणेफेक जिंकत गोलंदाजीचा निर्णय घेतला.
आयसीसीकडून विजेत्या संघाला पुरस्कार स्वरूपात ३७.३ कोटी आणि उपविजेत्यांना २० कोटी रुपये मिळतील.
खेळ आकड्यांचा सर्वाधिक धावा लॉरा
वोल्वाडर्ट (द. आफ्रिका) – ५७१
सर्वाधिक बळी: दीप्ती शर्मा
(भारत)- २२
१९७८ पासून एकदिवसीय विश्वचषकात खेळणाऱ्या भारताचे हे पहिलेच जेतेपद आहे. २००५, २०१७ मध्ये उपविजेता.
भारताने महिला विश्वचषक विजेत्यांच्या पंक्तीत प्रवेश केला. बलाढ्य ऑस्ट्रेलियाच्या नावावर सर्वाधिक सात विजेतेपद जमा आहेत. त्यानंतर इंग्लंड (४) आणि न्यूझीलंडचा (१) क्रमांक लागतो.