मुंबई : वाहन उत्पादनात आघाडीवर असलेल्या टाटा मोटर्सचा प्रवासी आणि वाणिज्य वाहन विभाग आता स्वतंत्र वाटेने वाटचाल करणार आहे. हे दोन्ही व्यवसाय विभाग स्वतंत्र करण्याची म्हणजे डीमर्जरची प्रक्रिया बुधवारी यशस्वीपणे पार पडली. टाटा मोटर्सचे दनस्वतंत्र सूचीबद्ध कंपन्यांमध्ये विभाजन झाल्यानंतर टाटा मोटर्स कमर्शियल व्हेइकल्स शेअर बाजारांमध्ये सूचीबद्ध झाले.
टाटा मोटर्सच्या कमर्शियल व्हेइकल शाखेचा शेअर्स एनएसईवर त्याच्या सुरुवातीच्या किमतीपेक्षा २८.४८ टक्क्यांनी वाढून ३३५ रुपयांवर उघडला. बीएसईवर तो २६.०९ टक्क्यांनी वाढून ३३०.२५ रुपयांवर सूचीबद्ध झाला. कंपनीचे एनएसईवरील बाजारमूल्य १,२२,३४५.४६ कोटी रुपये होते. टाटा मोटर्सचे विभाजन १ ऑक्टोबरपासून लागू झाले. टाटा मोटर्सच्या विभाजनाचा विचार २०१७-१८ पासून सुरू होता, परंतु कोविड महामारीमुळे या योजनेत अडथळा निर्माण झाला. विभाजनयोजनेवर काम नंतर पुन्हा सुरू करण्यात आले.
टाटा मोटर्सने २०२४ मध्ये त्यांचे व्यवसाय दोन वेगवेगळ्या युनिट्समध्ये विभाजित करण्याची घोषणा केली होती. विभाजनाचा एक भाग म्हणून, व्यावसायिक वाहन व्यवसाय आणि संबंधित गुंतवणूक एका कंपनीकडे हस्तांतरित करण्यात आली, तर प्रवासी वाहन व्यवसाय, ज्यामध्ये पीव्ही, इलेक्ट्रिक वाहने, जग्वार लैंड रोव्हर आणि संबंधित गुंतवणूक समाविष्ट आहे, दुसऱ्या कंपनीकडे हस्तांतरित करण्यात आली. टाटा मोटर्सच्या प्रवासी वाहन विभागाने १४ ऑक्टोबर रोजी स्वतंत्र व्यवसाय सुरू केला. विभाजनानंतर, कंपनीचे नाव टाटा मोटर्स पॅसेंजर व्हेइकल्स लिमिटेड असे ठेवण्यात आले.
इटलीतील व्यावसायिक वाहन निर्माता इव्हेको ग्रुपचे संरक्षण व्यवसाय वगळून ३.८ अब्ज युरो (सुमारे ३८,२४० कोटी रुपये) मध्ये अधिग्रहण करण्याचा मानस असल्याचे टाटा मोटर्सने जुलैमध्ये म्हटले होते. हा व्यवहार पुढील काही महिन्यांत पूर्ण होईल, असे टाटा सन्सचे अध्यक्ष एन. चंद्रशेखरन म्हणाले.
नवीन युगाची सुरुवात
टाटा मोटर्सच्या व्यावसायिक आणि प्रवासी वाहन व्यवसाय विभागांचे विलय हा एक महत्त्वाचा टप्पा असून, यामुळे एका नवीन युगाची सुरुवात झाली आहे आणि यामुळे दोन्ही कंपन्यांना दीर्घ सामायिक आर्थिक इतिहासानंतर स्वतंत्र वाढीचे धोरण तयार करण्याची परवानगी मिळेल. टाटा मोटर्स पॅसेंजर व्हेइकल्सला नेहमीच टाटा मोटर्स कमर्शियल व्हेइकल्सकडून पाठबळ मिळाले आहे. दोन्ही व्यवसाय मजबूत ठेवण्यासाठी टाटा मोटर्सचे विलय आवश्यक होते, असे चंद्रशेखरन यांनी टाटा मोटर्सच्या व्यावसायिक शाखेच्या सूचीकरण समारंभात बोलताना सांगितले.